ZALEN, June 02, 2026: ITI Veng GSA-in mikhual lo takin Mizoram Pro Volleyball League-ah bul an tan a, hmeichhe inkhel hmasa berah Thawhtanni tlai khan set hloh lovin Eric Pautu Academy an hneh.

ITI Veng hian Punjabi tleirawl, Jashan Preet Kaur-i la lutin Mizo hlanga khel, Eric Pautu Academy lakah danglamna a siam a, vawi 31 vaw tlain point kua hloh mah se chakpui tham hnuhma a nei a, Kuriz Player of the Match-a thlan a ni.

 Mizo player an neih ve veah team pahnih an inthlau lo va, ITI tan Lalrinzuali’n vawi khat tisualin point sarih a hmu a, Lalthazampuii’n point sarih tho hlawh chhuak mah se 12 a hloh va. Kum 18 mi, Jashan-i chuan team a thawm phui tha hle a, feet 5 leh inchi 7 vel chauha sang ni chungin a che vel a hmuhnawmin a zuan a zang a, a kutthlak a nat bakah a hma leh hnung atangin a vaw tla hnem hle.

Eric Pautu Academy player-te beiseiawm tak tak ni mah se inelna sangah tawn hriat an nei mang lo va, a tam zawk Mizoram volleyball inelna sang bera an inlan vawi khatna niin an hriam tawk lo va. An zinga tawn hriat nei hnem, Sarah Lalsuiengi’n vawi riat hlap tlain point nga a hloh a, hmel thar Lalchhanmawii leh Biaktharemi ten point ruk ve ve hmuin Anges Lalthlamuanpuii’n point nga a thawk chhuak bawk a, mi mala team fuih phur thei khawpa hnuhma nei zo an awm lo.

Pro Volleyball League-a la tel ngai lo vek team pali an inel a, an inlan hmasak berah ITI Veng mipuiin Thawhtanni tlaiah team tawiawmin LPS Arena, Falkland-ah eng emaw zat an pung khawm a, a tir atanga a tawp thlengin nuam ti takin hun an hmang.

Tleirawl chauh la ni mah se Jashan-i chuan nikumah Jimmy Club tan khel tawhin final a luhpui a, ITI tan ngampa takin a inlan nghal a, harsa lovin set khatna an la a. Set hnihna hneh takin an awpbet zui a, Jashan-i leh Zami ten an hlap tlak hnuah 24-14-in an sang.

Point khat hmuh belha tlang mai tur an nih laiin lehlamin bei letin an dang rei viau a, Thazami’n vawi thum, Jashan-i’n tum hnih tisualin point kua an hloh zawn a. Eric Pautu Academy-in phurna thar insiamin 23-24-in an hnaih chilh tawh tihin Chhanhimi’n a vaw sual a, ITI Vengin set an la zawn a ni.

Set thumnaah Jashan-i’n chiang taka a hlap tlak hnuah point li a hmuh belh zui a, Awlsam taka chak thei mai turin 23-16-in ITI an sang fal a; mahse, a tawp lamah rei lo te chhung inthununna hloh lehin Jashan-i leh Zami ten an vaw kai lo zawn a, lehlamin point 19 an hmu ve hman tihin Punjabi tleirawlin a hnung atangin set thum an lak zawnna point a hlawh chhuak ta tho a ni.

Vawi khat an inkhelh kual hnua a sang pahnihin final an lut dawn a, Zirtawpni zanah ITI-in Tuichangral hmachhawnin an khel leh dawn a, Nilaini zanah Eric Pautu Academy-in Chhinga Veng Spikers an khelhpui ve thung ang.

MIZORAM RURAL BANK PRO VOLLEYBALL LEAGUE 2026

May 11 - June 13, 2026 @ LPS Arena, Falkland, Aizawl

RESULT

Round 6 - June 01, 2026 (Thawhtanni)

ITI Veng GSA def Eric Pautu Academy (hmeichhia)

25-17, 25-23, 25-19 (3-0)

Kuriz Player of the Match - Jashan Preet Kaur (ITI Veng GSA)

Cheetak Fan of the Night - JH Lalnunpuii (ITI Veng)

MVA Lucky Fan - Irene (ITI Veng), Christy Lalchawimawii (Eric Pautu Academy)

STATS:

ITI VENG GSA

Jashan Preet Kaur: Point Hmuh - 31, Point Hloh - 9

Lalrinzuali: Point Hmuh - 7, Point Hloh - 1

Lalrammawii: Point Hmuh - 3, Point Hloh - 2

Lalthazampuii: Point Hmuh - 7, Point Hloh - 12

Lalrempuii (setter): Point Hmuh - 3, Point Hloh - 3

ERIC PAUTU ACADEMY

Sarah Lalsuiengi: Point Hmuh - 8, Point Hloh - 5

Lalchhanmawii: Point Hmuh - 6, Point Hloh - 2

Biaktharemi: Point Hmuh - 6, Point Hloh - 3

Anges Lalthlamuanpuii: Point Hmuh - 5, Point Hloh - 4

CS Zonunmawii: Point Hmuh - 3, Point Hloh - 1

Lalruatmawii: Point Hmuh - 2, Point Hloh - 5

Jacinta Rohlupuii (setter): Point Hmuh - 2, Point Hloh - 0

POINT TABLE

ITI VENG GSA: Play 1, Won 1, Loss 0 (set lak 3, set hloh 0) : Point 3

TUICHANGRAL: Play 1, Won 1, Loss 0 (set lak 3, set hloh 0) : Point 3

CHHINGA VENG: Play 1, Won 0, Loss 1 (set lak 0, set hloh 3) : Point 0

ERIC PAUTU ACADEMY: Play 1, Won 0, Loss 1 (set lak 0, set hloh 3) : Point 0

FIXTURE

MIPA - Round 7

June, 02, 2026 (Thawhlehni)

8:00 PM : Thutak Nunpuitu Team v Khawbel

HMEICHHIA - ROUND 2

June 03, 2026 (Nilaini)

8:00 PM : Eric Pautu Academy v Chhinga Veng Spikers

MIPA - Round 7

June 04, 2026 (Ningani)

8:00 PM : Tuichangral v Sihphir

HMEICHHIA - ROUND 2

June 05, 2026 (Zirtawpni)

8:00 PM : ITI Veng GSA v Tuichangral

MIPA - Round 7

June 06, 2026 (Inrinni)

8:00 PM : Chhinga Veng Spikers v Hunthar