ZALEN, May 16, 2025: An khelh hmasak berah tha takin Jimmy Kanan an inlan a, Ningani zan EverHome Pro Volleyball League-ah set li set khata Bungkawn an hneh rualin final an lut nghal.

LPS Arena, Falkland-ah Pro Volleyball avanga indin chawp Kanan team-in tlangnel takin bul an tan a, Punjabi tleirawl, Jashanpreet Kaur leh Lalhriatpuii’n point 32 thawk chhuak dunin 15-9, 15-9, 15-10, 15-6, 11-15-in an chak.

Tun season Pro Division-ah hmeichhe team thum an awm a, Pro Volleyball-ah Kolasib an tel theih loh avangin chawpchilh takin Jimmy Club an inziak lut a; tawn hriat nei tawhte leh state dang atangin player an la khawm a, team tha tak an din.

Kum 17 mi, Jashanpreet chuan Ninganiah Aizawl rawn lutin zanah a inkhel nghal a, point ruk hlohin vawi 20 a vaw tla a, Kuriz Player of the Match-a thlan a ni a. Veikhawr Hriati’n tum 12 hlap tlain point li a hloh a, tha takin Kanan team tan an inthlawp.

Bungkawnin an duhthusam puitlin lo bawkin championship an thlah liam leh a, Elisian Medai chuan tum 16 vaw tlain point li a hloh va. Mi malin che chhe lo mah se a tanpuite zingah point thum aia tam hmu phak an awm lo va, team pum pui an pawt hniam.

Thawhlehni khan hmeichhe inkhel hmasa berah Bungkawn tlawm tawhin set an lak hmasak hnuah champion lai, Luangmual lakah set li an hloh zawn a. Team pathum zinga state pawn player nei ve lo awm chhunin league an khel zo a, Mizoram inelna sang bera team hlun tak ni mah se an tel hmasak ber, kum 2019 atangin an la champion lo.

Jimmy Club-in team thar an nih hriat lohin inkhel an thunun a, set li an lak zawn rualin final an lut chiang nghal a. May 19 khian league khar nan Luangmual nen final urlawk nan an intawng dawn a, May 23-ah champion nih inchuhin an inkhel nawn leh ang.

A tir atangin Jashanpreet leh Bungkawn spiker Elisian an inel a, point siam nan ball an hmu tam ve ve a. Punjabi tleirawlin a vuak kai loh hnuah Serkawn Lunglei nulain a hlap tla ve thung a, 4-2-in Bungkawn an sang.

An khelh chhoh zel hnuah team pum pui khaikhinin Jimmy Club an chungnung a, feet 5 leh inchi 8-a sang, Jashanpreet chuan a hma leh hnung atangin na takin a vuak tlak fo avangin danglamna a thlen.

TNT star spiker Vanlaltanchhana u, Hriati’n a ball hmuh awmze neiin a chhuah a, 5-5 atangin Bungkawn an kalsan a. Pro Volleyball-a tawn hriat nei tawh, R Laltleipuii leh Lalmuanpuii’n a kar awl hnawh khat bawkin harsa lovin Jimmy Club-in set an la.

Set hnihnaah Elisian tih loh mi dangin point hmuh an harsat avangin Bungkawnin chet an harsat zui zel a. Rinrawla an hman thin, F Lalparmawii’n an inkhelh chhungin point thum a hmuh zat chiah a hloh a, 15-9 bawkin Jimmy Club-in set an la zawn.

Set thumnaah thil awm dan a danglam tam lo va, Jashanpreet chuan hmuhnawm leh rin tlakin a khel a; chutih laiin 13-4-a an fal hnuah Jimmy Club-in ho takin point khat aia tam an hloh a, Bungkawnin an inkar tizimin point ruk hmu an zawn a. Mahse, Punjabi tleirawlin a hnung atangin a vaw tla a, a elpui Elisian chuan hlap kai lo ve thungin Kanan team an tlang.

Set linaah Kolasib nula, Muani’n Jimmy Club fuih phur ve thungin point a hmu zawn chho a, 13-6-in an sang leh a. Inthlahdah zui lovin Hriati leh Lalrammawii’n an vaw tla zawn a, set li an lak zawn rualin final lut turin an him nghal bawk.

Bungkawnin beiseina an neih tawh loh hnuah ze puitling an lantir a, set hnuhnung berah Elisian chuan a vuak tlak hnuah net chung atangin Jashanpreet-i hlap a dang tla zui a, FP Lalduhkimi’n point a hmuh ve leh hnuah 9-3-in an sang.

Jimmy Club an mar tluan lo va, Muani’n a vuak tlak rualin 10-9-in hnaih leh hman mah se Bungkawnin set khat tal lak ngei an tum tih an lantir zui zel a. RK Lalfakmawii leh Lallawmawmi’n point an hmu zawn a, a tawp thlengin point thuma inthlau chungin set ngana an la a ni.

EVERHOME PRO VOLLEYBALL LEAGUE 2025 @ LPS Arena, Falkland

LEAGUE ROUND 1 : RESULT

May 15 (Ningani) Zan

Jimmy Kanan def Bungkawn (hmeichhia)

= 15-9, 15-9, 15-10, 15-6, 11-15 (4-1)

Kuriz Player of the Match

= Jashanpreet Kaur (Jimmy Kanan)

STATS:

JIMMY KANAN:

Jashanpreet Kaur: point hmuh 20, point hloh 6

Lalhriatpuii: point hmuh 12, point hloh 4

Lalmuanpuii: point hmuh 9, point hloh 6

R Laltleipuii: point hmuh 2, point hloh 2

R Malsawmtluangi: point hmuh 1, point hloh 0

Lalrempuii (setter): point hmuh 2, point hloh 1

BUNGKAWN:

Elisian Medai: point hmuh 16, point hloh 4

F Lalparmawii: point hmuh 3, point hloh 3

Chinglunkimi: point hmuh 3, point hloh 3

Lalchhandami: point hmuh 2, point hloh 1

Lalpekhlui: point hmuh 0, point hloh 1

Melody Lallawmkimi (setter): point hmuh 0, point hloh 3

FIXTURE:

MAY 16, 2025 (ZIRTAWPNI) - 8:00 PM

Khawbel v Thutak Nunpuitu Team (mipa)

MAY 17, 2025 (INRINNI) - 8:00 PM

Tuichangral v Sihphir (mipa)

MAY 19, 2025 (THAWHTANNI) - 8:00 PM

Jimmy Kanan v Luangmual (hmeichhia)