Zothan Autoworks Pro Volleyball League inkhel hmasa ber Zirtawpni zana neihah Durtlang North leh Chhinga Veng Spikers an inkhel a, Durtlang North chuan 2019 final-a an tlawmna chhang letin set 3-2-in champion lai Chhinga Veng Spikers lakah phuba an la. 

R Dengthuama Indoor Stadium, Mualpui-a inkhelhah Durtlang North tan Haryana mi Sagar Malik leh Fabian Lallunghnema te an tangkai a, an team chu 25-22, 23-25, 17-25, 25-17, 15-13-in an chakpui a ni. Sagar chuan point sarih a paih laiin 31 a thawk chhuak a, tlar hnunga a awm lai pawhin Durtlang North chhanhimtu berah a tang a, D3 Business Player of the Night lawmman dawng hmasa ber niin Kolasib spiker Fabian-an point 19 hmuin vawi ruk a tisual ve thung.

Kum thum kal ta khan 25-23, 18-25, 22-25, 31-29, 15-13-in Durtlang North lakah Chhinga Veng an chak a, derthawng taka an awm hnuah a vawi khat nan Pro Volleyball-ah an champion. Covid-19 leng avanga kum hnih thulh zawn a nih hnuah Chhinga Vengin title humhim ngei turin bul an tan a, a tir lamah captain Lallianmawia Pachuau chuan team fuih phurin set hmasa berah 11-6-in hma an hruai hman.

Mahse, Karnataka atanga an lak luh Sujith Acharya a insiam rem nghal lo va, point a hloh hnem hle laiin Fabian-a leh Sagar chuan Durtlang North nawr kalin an lehpel a, 24-22-a hma an hruai laiin Vanlalmawia'n Sujith-a vuak dang thlain set hmasa ber an la.

Set hnihna atangin Chhinga Vengin hma an sawn a, Lianmawia a tangkaiin Sujith chuan awmze neiin a khel thei tawh a, inelna sang tak karah chungnung zawkin inkhel boruak a nung thar nghal bawk.

Spikers-in set thumna thunun zuiin rinrawl Lianmawia leh Sujith bakah Lalnunpuia leh Ramengmawia'n team tichakin inringtawk takin an khel a, Lianmawia'n chiang taka a vuak tlak rualin Dutlang North-in point 17 chiah an hmu ve hman a ni.

Durtlang North tan set hloh a thiang tawh lo va, Sagar chuan team mamawh chhangin inkhel boruak an tidanglam. Set khat chiah mamawh tawh Spikers inrintawkna a tlahniam a, an kir leh thei tawh lo.

Durtlang North-in derthawng lova set lina an lak hnuah tanhmun an siam zui zel a, a chak tur chin felna hnuhnungah team nghet leh tlo zawk an nihna an lantir theiin, Fabian-a'n vaw tlak rualin 9-6-in hma an hruai. 

Spikers-in hnaih chilh thei lo va, hun pawimawhah Sagar-an Durtlang North kalpuiin vawi thum a hlap tla zawn. Point khat hloha tlawm zui mai turin 14-12-a Chhinga Veng an hniam a, vawi khat dang thei mah se Lalbiakmuana'n hlap thlain kum thum kal taa rilru na taka an tlawmna chhang letin hlim takin hnehna an lawm.

A chak rualin veikhawr Biakmuana erawh a langsar zo lo va, an inkhelh chhungin point ruk hmuin vawi li a tisual. Hetih lai hian Durtlang North tan Vanlaltanpuia'n point ruk tho hmuin point hnih a hloh ve thung a ni.

Chhinga Veng tan Sujith chuan point 30 hmu mah se 19 a hloh a, Lianmawia'n fel fai takin a khel a, point 19 thawk chhuakin tum li chauh a tihsual. An pahnih bakah Spikers tan Nunpuia'n vawi 11 vaw tlain point li a hloh a, Ramengmawia'n point kua hmuin point thum a paih a ni.

Player khaikhinin Chhinga Veng inkhairual zawk mah se Durtlang North tan point pawimawh leh boruak sangah Sagar leh Fabian-a an rin tlak a, intiat tawk tak chungin team pahnih inkarah danglamna an siam thei.

Kar leh thawhtanniah Chhinga Vengin an khel leh nghal dawn a, Mizo hlanga inlan tur awm chhun TNT an hmachhawn ang. May 11, nilaini zanah Durtlang North-in vawi hnih champion tawh Hunthar an khelhpui ve thung dawn a ni.

Result
 
Durtlang North def Chhinga Veng Spikers
- 25-22, 23-25, 17-25, 25-17, 15-13 (3-2)

D3 Business Player of the Night
- Sagar Malik (Durtlang North)

Play stats :

DURTLANG NORTH

Sagar Malik : point hmuh 31, point hloh 7
Fabian Lallunghnema : point hmuh 19, point hloh 6
Vanlalṭanpuia : point hmuh 6, point hloh 2
Lalbiakmuana : point hmuh 6, point hloh 4

CHHINGA VENG SPIKERS

Sujith Acharya : point hmuh 30, point hloh 19
Lallianmawia Pachuau : point hmuh 19, point hloh 4
Lalnunpuia : point hmuh 11, point hloh 4
Ramengmawia : point hmuh 9, point hloh 3

LEAGUE FIXTURE :
May 09, Thawhtanni - 8m : Chhinga Veng Spikers v TNT (mipa)
May 10, Thawhlehni - 3pm : Durtlang v Bungkawn (hmeichhia)
            8pm : Bethlehem Vengthlang v Kanan (hmeichhia)
May 11, Nilaini - 8pm : Durtlang North v Hunthar (mipa)
May 12, Ningani - 8pm : Tuichangral v TNT (mipa)
May 13, Zirtawpni - 3pm : Durtlang v Bethlehem Vengthlang (hmeichhia)
            8pm : Bungkawn v Kanan (hmeichhia)