Thla thara khelh tur, Pro Volleyball League lawmman pawisa fai tihpun a ni dawn a, nikum aiin team tel pawh paliin an pung bawk ang.

Mipa team ruk - Durtlang North, TNT, Hunthar, Chhinga Veng Spikers, Tuichangral leh Tuipuiral leh hmeichhia team sarih - Bethlehem Vengthlang, Bungkawn, Durtlang, Kanan, Power Department Sporting Club, Armed Veng South leh Luangmual an inel ang.

Kum hmasa aiin team tel paliin an tam dawn a, June 2 atanga 30 chhungin R Dengthuama Indoor Stadium, Mualpuiah khelh a ni ang.

Working Committee chuan a hma aia tel an tam avangin lawmman pawisa fai sem chhuah tam a ngai dawn hrim hrim a; chutih rualin champion leh team dangten pawisa an hmuh thin tihpun a ni dawn tih sawiin a zat tur tak erawh bituk an la siam fel lo.

Nikum khan mipa team nga leh hmeichhe team li an tel a, mi mal chawimawina tel lovin team tan Rs 4,15,000 sen a ni.

Kalphung pangngai angin team tinin Mizoram pawn atangin an duh zat player an chaw lut thei a; mahse, khelmuala lut player paruk zingah pakhat bak an chhawr thei dawn lo a ni.

Boruak lian leh inelna sang zawk a awm theih nan hma lak zel an tum rualin, an ngaih pawimawh ber erawh Mizote hmasawnna tur a nih thu an sawi.

Club-ten harsatna an neih hriatthiampui chungin thutlukna pawimawh siam zui zel a nih ang tih an sawi bawk.

Working Committee Chairman C Lalrokhuma chuan, “Mizoram pumah volleyball khel an pun zel avangin Pro Volleyball-in kum dang aia ngaihhlut a hlawh phah ka ring a, entu pawh an pun ngei ka beisei,” a ti.

“Tun tumah hian kan thawhpui, LPS Vision-in sum leh pai enkawlna leh inrelbawlna kawng hrang hrangah thuneihna sang zawk mi pe a, Mizoram Volleyball Association tan chona lawmawm tak a ni,” a ti.