Durtlang North-in hnuhma chhia neih belhin Thawhlehni zan Tata SK 712 Pro Volleyball League-ah Chhinga Veng Spikers-in 3-1-in an hneh a, champion lai ni chungin vawi thum an tlawm zawn.

R Dengthuama Indoor Stadium, Mualpuiah Durtlang North-in 21-18-a sang zawk an nih hnuah deuce-puiin set khatna an la hram a, Hunthar nen an inkhelh tum ang bawkin set an lak hnuah harsatna an tawk zui.

Javed Khan chuan Chhinga Veng Spikers hruai kirin 24-26, 25-21, 25-18, 25-16-in an chak a, Rajasthan spiker hian point 41 hmuin 15 a hloh a, a vawi khat nan D3 Business Player of the Match-a thlan a ni.

2022 Pro Volleyball-ah champion lai ni chunga league vawi li an khelhah Chhinga Veng an tlawm fai vek a, tun season-ah title lak kir tumin vawi hnih an khel tawh a, an chak zawn.

Durtlang North-in Spikers sulhnu chhia chhui mekin an khelh hmasak berah set la lovin TNT lakah an tlawm nghal a, Hunthar nen vawi nga an deuce hnuah set khatna la mah se a zuih ral tawh a ni.

Durtlang North a champion-pui hnuah Lalbiakmuana’n a chenna veng, Chhinga Veng club a zawmsan a, a team hlui ep zawnga Pro Volleyball a khelh hmasak berah vaw sualin 26-24-in Durtlang North-in set an la a, au elna tawng telin Tuipuiral an hneh tum angin a che thei lo.

Biakmuana’n point kua a hmuh aia tam hlohin tum 10 a tisual a; mahse, Javed chuan kawng dikah Spikers a hruai zui a, set hnihna atangin inkhel an thunun a, K Lalfakawma’n vawi 14 vaw tlain point li chiah a paih a, net bula lehlam vuak dang tura zuang taima PC Lallianmawia’n a hloh aia point hniha tam tum sarih a hlap tla.

Durtlang North-in vuak tlak an harsatnain ball vuakah an khan lo tel bawk a, an innghahna pawimawh Karnataka captain Anup D Costa chuan point 20 vaw chhuak mah se 13 paihin team a chawi kang zo lo.

Captain Fabian Lallunghnema’n point 15 hmuin tum ruk a tisual a, set hnihna tir lamah chiang taka a vuak thlak rualin 7-3-in an sang hman a; mahse, nghet leh tlo taka hma lam pan an harsat a, Chhinga Vengin awmze neia an nawr let hnuah kir leh tawh lovin a bet zawk an ni tluan.

Rin hlawh pahnih, Hunthar leh TNT ang bawkin 2019 champion Chhinga Vengin khelh hnihah point ruk an hmu a, Zirtawpni zanah fiahna tak tak hmachhawnin TNT nen an intawng ang.

Durtlang North-in league khelh hnih an la neihah an zahawmna humhim turin vawi khat tal chak an mamawh a, Ningani zanah vawi hnih an khelh tawha tlawm zawn mek Tuichangral nen an inhmachhawn dawn a ni.

Stats:
CHHINGA VENG:
Javed Khan: point hmuh - 41, point hloh - 15
K Lalfakawma: point hmuh - 14, point hloh - 4
PC Lallianmawia: point hmuh - 7, point hloh - 5
Samuel VL Nunhlima: point hmuh - 3, point hloh - 2
Lalbiakmuana: point hmuh - 9, point hloh - 10
Joseph Lalbiaksanga: point hmuh - 2, point hloh - 3

DURTLANG NORTH
Anup D Costa: point hmuh - 20, point hloh - 13
Fabian Lallunghnema: point hmuh - 15, point hloh - 6
R Vanlalmawia: point hmuh - 5, point hloh - 2
Vanlaltanpuia: point hmuh - 5, point hloh - 0
Johan Vanneihsanga: point hmuh - 2, point hloh - 2

POINT TABLE:
1. TNT: Play 2, Won 2, Loss 0 - Point 6
2. Hunthar: Play 2, Won 2, Loss 0 - Point 6
3. Chhinga Veng Spikers: Play 2, Won 2, Loss 0 - Point 6
4. Tuichangral: Play 2, Won 0, Loss 2 - Point 0
5. Tuipuiral: Play 1, Won 0, Loss 1 - Point 0
6. Durtlang North: Play 3, Won 0, Loss 3 - Point 0

FIXTURE:
JUNE 14 (NILAINI):
03:30 pm: Bungkawn v Luangmual (hmeichhia)
08:00 pm: Tuipuiral v TNT (mipa)

JUNE 15 (NINGANI):
08:00 pm: Tuichangral v Durtlang North (mipa)