Hlut hlawh Pro Volleyball League chu zanin dar 8 hian Zothan Autoworks Pro Volleyball League chu kum thum hnua a vawi khat nan R. Dengthuama Indoor Stadium, Mualpui-ah tan a ni dawn a, zanin hian championship hnuhnung ber finalist Chhinga Veng Spikers leh Durtlang North an inhmachhawn nghal dawn a, 2019-a vanduai ta zawk Durtlang North hian phuba lak ngei an tumin a rinawm a, a zan khatna atangin a hot nghal dawn tih a chiang reng. 

Pro Volleyball vawi 5-naah hian team tha tak tak mipa lam atangin team nga an tel dawn a, chungte chu Chhinga Veng Spikers (2019 champion, champion lai), Durtlang North (2019 RunnersUp), Hunthar (2017 leh 2018 champion), Tuichangral (2019 semi-finalist), Thutak Nunpuitu Team (2016 RunnersUp) an ni. Hmeichhe team hi pali anni thung dawn a, Mizoram team tha ber ber an nih vangin an hmuhnawm hle bawk tura ngaih an ni. Team chhuak tur te chu Durtlang (2019 Champion, champion lai), Bungkawn (2019 RunnersUp), Bethlehem Vengthlang, Kanan veng te an ni.
 
2019 final khan zanina khel tur Durtlang North hian deciding game-ah Chhinga Veng Spikers te hi an hneh teuh hle a, champion theihna hun tha bawhpelhin an champion zo lova, zanin hian tlawm nawn an tum lo. Naktuk Inrinni zana inkhel tur pawh hi a hmuhnawm ngeiin a rinawm. Tumhnih champion tawh Hunthar leh mipa team-a Aizawl pawn lam awmchhun Tuichangral an in hmachhawn ang. 

Thahnem ngaihna thu

Pro Volleyball league hi hmuhnawm viau thin mahse, mi thenkhat chuan State dang player tha leh pumruaa sang zawk an lak thin chu an ngaimawh thu an sawi a. Basketball nen hian pumrua (figure) a innghat tel sport a nih vangin, sum tam tak senga pumruaa sang zawk hnam dang player te chah lovin tualchhung players ten khel maise thaa an rin thu an sawi. Nu leh pa tam tak chuan hnamdang hmaa Mizo tlangval infiammi te tangtlawm lutuk chu TV lam atang pawha en nuam an tih loh thu an sawi chhuak a ni.