Trophy pathum nena season khar tum, Kananin Zirtawpni tlaiah 3-0-in Power Department Sporting Club an hneh a, Tata SK 712 Pro Volleyball League semifinal an lut.

R Dengthuama Indoor Stadium, Mualpuiah Kanan player-ten inkhairual leh thawh hona tha tak an lantir a, 25-12, 25-20, 25-21-a an chak rualin league vawi thum an khelhah chak vekin set khat chiah an la hloh.

Fel fai taka inlan, Lalramliani’n point 10 hmuin tum khat chiah a tisual a, D3 Business Player of the Match lawmman dawngin a kawppui, Lalhriatpuii’n point ruk hloh mah se vawi 13 a vaw tla ve thung a, harsa lovin Kananin set hnih an la zawn nghal.

Power-in kir leh tumin an bei let a, veteran Vardingliani’n vawi hnih tisuala point 10 hmuh zinga a eng emaw zat set thumnaah a hlawh chhuak a, 21-19-in hma an hruai.

Thiamna hrang hmang hnem zawk Kananin team leh mi mal khaikhinin an chungnung tih chiang takin an lantir a; dinhmun hniam zawka an awm hnuah lehlam dang betin point ruk an hmu zawn thei.

Phu taka an chak theih nan Rami leh Hriati bakah Lalbiakngheti’n point kua hlawhin tum hnih a tisual a, R Laltleipuii’n point li paih mah se tum sarih a hlap tla a ni.

Season kal mek Pro Division hmeichhe inelna pahnih awm tawhah Kanan an champion ve ve a, lungthu kim chunga kum khar tur leh a vawi khat nan Mizoram inelna sang bera champion tumin an bei mek a, an hmabaka awm, Luangmual nen rin an hlawh.

Kai thar, Luangmualin Kanan ang bawka league vawi thum an khelhah hnehna chang vekin semifinal an lut fel tawh a, Ningani tlai league kharnaah an intawng dawn a ni.

Pro Volleyball hmeichhe inelna hmasa ber, 2017-ah Power an champion a. Club tinung zui lova kum nga vel thih hnuah tuai thar leh mah se team tinung thei player chhuak thar tha an kawl lo.

Vanglai pel leh chawlh tawh an koh kir zinga mi, Dingi’n ngaiawh pha tawh lo hle mah se team innghahna ber a ni a, amah thlawp thei ber, FP Lalduhkimi’n point riat a hmuh chanve a hloh.

Championship tihlutu ni mah se nihna sang nei, Power dinhmun kha an chhawm nung tawh lo.

Vawi thum an khelhah tlawm vekin a hniam pahnih zingah an tel a, Thawhtanni tlaiah Bethlehem Vengthlang nen an inkhel dawn a ni.

Stats:
KANAN:
Lalramliani: point hmuh - 10, point hloh - 1
Lalhriatpuii: point hmuh - 13, point hloh - 6
Lalbiakngheti: point hmuh - 9, point hloh - 2
R Laltleipuii: point hmuh - 7, point hloh - 4
B Tlangmawii Varte: point hmuh - 3, point hloh - 5
Remlalnghaki: point hmuh - 1, point hloh - 2

POWER:
Vardingliani: point hmuh - 10, point hloh - 2
FP Lalduhkimi: point hmuh - 8, point hloh - 4
Lalfakzuali: point hmuh - 4, point hloh - 2
Vanlalremruati: point hmuh - 1, point hloh - 4
Lalrammawii: point hmuh - 4, point hloh - 8

POINT TABLE:
1. Kanan: Play 3, Won 3, Loss 0 - Point 9
2. Luangmual: Play 3, Won 3, Loss 0 - Point 9
3. Bethlehem Vengthlang: Play 4, Won 2, Loss 2 - Point 6
4. Bungkawn: Play 4, Won 2, Loss 2 - Point 5
5. Power Department SC: Play 3, Won 0, Loss 3 - Point 1
6. Durtlang: Play 3, Won 0, Loss 3 - Point 0

FIXTURE
JUNE 16 (ZIRTAWPNI):
08:00 pm: TNT v Chhinga Veng Spikers (mipa)

JUNE 17 (INRINNI):
03:30 pm: Durtlang v Luangmual (hmeichhia)
08:00 pm: Hunthar v Tuipuiral (mipa)