Mizorama team hlawhtling, Thutak Nunpuitu Team (TNT)-in an la puitlin loh trophy lak tumin kawng dik an zawh mek a, Thawhtanni zan Tata SK 712 Pro Volleyball League-ah 3-1-in Tuichangral an hneh.

R Dengthuama Indoor Stadium, Mualpuiah set hmasa ber hloh mah se ropui takin an kir leh a, Vanlaltanchhana (Valbuanga) chuan vawi nga tisual chungin point 31 a hmu a, 28-30, 25-15, 25-18, 29-27-in TNT an chak.

Nikum khan a vawi hnih nan Pro Volleyball final khelin a hma ang bawkin harsatna an tawk a, Durtlang North an ngam lo va. TNT-in inrintawkna sang zawk nen bul an tan a, league an khelh hmasak berah Durtlang North laka an tlawmna an chhang let nghal.

El tham Tuichangral hmaah team fei leh nghet, thawh hona nei tha an nihzia lantirin an khelhpuite aiin ho taka point paih an nei tlem a, chu chu an hmasawnna leh danglamna a ni zel.

Set khatna inchuhin vawi nga an deuce hnuah 29-28-in TNT an hniam a, D3 Business Player of the Match lawmman dawngtu, Valbuanga’n vaw sualin 2018-a final lut, Tuichangral an tlang.

An boruak a hniam laiin TNT zawkin inkhel an tidanglam zui a, Kawnpui tlangval, Valbuanga’n team fuih phurin harsa lo takin set an la zawn a. Net bula lehlam vuak dangtu ber, Zosangzuala’n a hlutna a lantir bawk a, an inkhel chhungin point khat chiah hlohin 13 a thawk chhuak.

Vuak tlak an harsat avanga an tlak hniam hnuah Tuichangral insiam thar ve lehin Vinod Khatkar chuan a hlap tla a, 24-23-in hma an hruai a. Set lina la thei turin Khawhai spiker Saidingpuia Sailo chuan hun tha a nei a, line pawnah a vuak chhuak hlauh.

Boruak sosang tak hnuaiah setter tawn hriat nei, Lalliankima’n chiai lo takin inkhel a thunun a, 27-27 a nih hnuah Laldinchhunga’n vawi hnih a vaw tla zawn a. Set khatnaa an chet sual tawhna siam tha nghalin table chung berah TNT an inhlangkai.

TNT tan Dinchhunga’n vawi 14 vaw tlain point ruk a hloh a, Sadraka Fanai chuan 12 hmuin tum thum a tisual ve thung. Tuichangral innghahna, Vinod chuan point 27 thawk chhuak mah se 14 a hloh a, Hunthar an hneh loh tuma hliam vanga lak chhuah ngai, Saitea’n tum 20 hlap tlain 12 a paih bawk a ni.

Biak in chhunga inkhel mai thin, TNT-in rawngbawlna peng khata an hman mek, volleyball-ah sulhnu an nghah hle laiin trophy an dah khawmnaah Mizoram inelna sang ber, Pro Volleyball a tel ve lo.

Mizo hlanga champion hmasa ber nih tumin an bei mek a, Nilaini zanah rin hlawh zawk ni chungin kai thar Tuipuiral nen an inkhel ang. A tuk zanah Tuichangralin anni ang bawkah an khelh hmasak vawi hniha tlawm ve ve, Durtlang North an hmachhawn dawn a ni.

Stats:
TNT:
Vanlaltanchhana: point hmuh - 31, point hloh - 5
Zosangzuala: point hmuh - 13, point hloh - 1
Sadrak Fanai: point hmuh - 12, point hloh - 3
Laldinchhunga: point hmuh - 14, point hloh - 6
Vanlalchhantluanga Sailo: point hmuh - 4, point hloh - 4

TUICHANGRAL:
Vinod Khatkar: point hmuh - 27, point hloh - 14
Saidingpuia Sailo: point hmuh - 20, point hloh - 12
Lalhmunmawia: point hmuh - 11, point hloh - 3
H Lalrinmawia: point hmuh - 4, point hloh - 0
Thangminlal: point hmuh - 2, point hloh - 1

TABLE
1. TNT: Play 2, Won 2, Loss 0 - Point 6
2. Hunthar: Play 2, Won 2, Loss 0 - Point 6
3. Chhinga Veng Spikers: Play 1, Won 1, Loss 0 - Point 3
4. Tuichangral: Play 2, Won 0, Loss 2 - Point 0
5. Tuipuiral: Play 1, Won 0, Loss 1 - Point 0
6. Durtlang North: Play 2, Won 0, Loss 2 - Point 0

FIXTURE:
JUNE 13 (THAWHLEHNI):
03:30 pm: Bethlehem Vengthlang v Durtlang (hmeichhia)
08:00 pm: Chhinga Veng Spikers v Durtlang North (mipa)

JUNE 14 (NILAINI):
03:30 pm: Bungkawn v Luangmual (hmeichhia)
08:00 pm: Tuipuiral v TNT (mipa)