Tata SK 712 Pro Volleyball League khelh meka Mizo hlanga khel awm chhun, Thutak Nunpuitu Team chuan khelh hnih la nei chungin Ningani zan khan semifinal an lut ta.

R Dengthuama Indoor Stadium, Mualpuia inelna kal mekah Ningani zan khan Tuichangralin champion lai, Durtlang North chu 3-2 (20-25, 25-23, 18-25, 26-24, 15-12)-in an hneh a. Chak zawk ni mah se Tuichangral hian set hnih an hloh ve tho avangin point hnih bak an hlawh chhuak zo lo va, hei vang hian hmahruaitu, TNT-in khelh hnih la nei chungin semifinal an luh phah a, point kua an neih mek chu an umpha thei tawh lo.

Mizorama volleball team hlawhtling, TNT hian vawi thum an khel tawh a, hnehna an la chang vek a. An khelh hmasak berah nikum final-a an hneh loh, Durtlang North chu 3-0 (25-11, 25-21, 25-23)-in an hneh nghal.

An khelh vawi hnihnaah Tuichangral chu 3-1 (28-30, 25-15, 25-18, 29-27)-a hneh lehin an khelh hnuhnung ber, Nilaini zan khan Tuipuiral chu 3-0 (25-16, 25-10, 25-14) bawkin an hneh leh.

An la champion lohna inelnaa champion ngei tuma inbuatsaih, TNT tan hian 2022 Pro Volleyball Mizo player tha ber, Vanlaltanchhana (Valbuanga) a hmuhnawm thin a, vawi thum an khelh tawhah hian D3 Business Player of the Match atan thlan vek a la ni.

Pro Volleyball League khelh mekah hian hmeichhe lamah kai thar, Luangmual chuan Thawhtanni tlaia 3-0-a Bungkawn an hneh hnuah semifinal an lut a, a sang pali zinga tel hmasa ber an ni a. Ningani zanah Tuichangral leh Durtlang North inkhel result avangin TNT hian an zui leh ta a ni.

Intihsiakna tan hma khan coach Lalhmangaihsanga Sailo chuan a vawi khat nan Mizoram volleyball inelna sang berah champion an tum tih a sawi a, “Kuminah tha zawk, nghet zawk leh tlo zawk turin kan inbuatsaih a, Pathian rin chhan chungin champion thei tura khawpa kan khelh theih ngei kan ring a ni,” a ti.

TNT sports incharge Lalzawmliana chuan rawngbawl nan volleyball an kalpui tih a sawi rualin, senso a hautak avang leh chhan dang avangin team tichak turin Mizoram pawn atanga player tha an la lut dawn lo tih a sawi a ni.

Mipa semifinal lut hmasa ber, TNT hian Zirtawpni zan dar 8:00-ah Chhinga Veng Spikers an hmachhawn ang a. Nilaini zanah an hnuai chiaha awm, Hunthar nen an league match hnuhnung ber an khar ang.

POINT TABLE:
1. Thutak Nunpuitu Team: Play 3, Won 3, Loss 0 - Point 9
2. Hunthar: Play 2, Won 2, Loss 0 - Point 6
3. Chhinga Veng Spikers: Play 2, Won 2, Loss 0 - Point 6
4. Tuichangral: Play 3, Won 1, Loss 2 - Point 2
5. Durtlang North: Play 4, Won 0, Loss 4 - Point 1
6. Tuipuiral: Play 2, Won 0, Loss 2 - Point 0