ZALEN, May 10, 2025: Niyas Abdul Salam chuan vawi 41 vaw tlain Sihphirin hnehna hlu tak an chang a, Zirtawpni zan EverHome Pro Volleyball League-ah set thum faiin Thutak Nunpuitu Team (TNT) an barakhaih.

LPS Arena, Falkland-ah Niyas chuan point 14 a hloh laiin league kal meka mi mala point 40 leh a aia tam thawk chhuak hmasa ber a ni a, dan theih lohin a filawr a, 25-22, 25-16, 25-21-in Sihphir a chakpui.

Hunthar leh Anastasia Electric Veng an hneh zawn hnuah rin hlawh mah se, zan zawna an khelh avanga Sihphir talbuai tawhnaah TNT-in harsatna an tawk ve leh chiah a. Team pum pui tla hniam thar lehin May 16-ah league an khel zo dawn a, an hma lam hun tichiang turin Khawbel nen an intawng ang.

Sihphirin league bul an tannaah Anastasia hneh nghal mah se awl nei lovin zan zawna an khelh a ngai a, Khawbel lakah set la lova chiang taka an tlawm hnuah Hunthar an hneh lo zui leh a, an derthawng hman.

Ningani zanah Anastasia lakah tha takin TNT an inlan a, Zirtawpni zan erawh Niyas leh Sihphir an ngam lo hle a. Set thumna tirah 1-0 leh 3-2-in an sang ve zawk a, hei bak Sihphirin hma an hruai tluan zak a, hneh taka inkhel awpbet chungin semifinal luhna kawng an sat êng.

Sihphir tan Lalhmunmawia’n vawi ruk vaw tlain point li a hloh a, H Lalrinmawia’n point li a hmuh chanve paih bawkin Thangminlal Guite chuan hloh nei lo mah se tum hnih chiah a hlap tla bawk a. Mi malin Niyas a chungnung a, a vawi hnih nan Kuriz Player of the Match lawman a dawng.

A tir atangin TNT an bet a, hahchawlhna hun thawl an neih loh vang nge an khel a nung lo va, vuak tlak an harsat bakah an thatna thin, net chunga lehlam vuak dan kawngah pawh Niyas an dang hneh lo hle.

Vantanchhana’n tum 16 hlap tlain point ruk a hloh a, lehlam rinrawl a el zo lo va. A hma zana Anastasia laka khel tha tak, Zosangzuala’n point 10 a thawk chhuak tling lo va, K Zodingliana’n zan hmasa ang chiahin point khat hlohin point riat a hmu ve thung a, awmze nei thamin Saidingpuia Sailo a inlan phak lo.

Sihphirin semifinal lut thei dinhmun luah lailawkin league inkhel hnuhnung ber, May 17-ah Tuichangral an hmachhawn ang a. Coach Lalchhuangliana chuan Pro Volleyball neih tawhah tun hi team hrang hrang inel tawk ber tum a ni dawn tih a lo sawi lawk tawh a, eng team mah vawi hnih aia tam chak zawn thei an awm rih lo a ni.

Khelh hnih tlawm zawn lai an nih avangin Sihphirin chak an mamawhna a sang a, TNT hmaah Niyas chuan point hmasa ber hmuin a hnu deuhah vawi li a hmu zawn a, 9-4-in an sang nghal a. Muanna Veng team-in an inkar an tizim mai thei lo va, a hnuah 22-17-in Sihphir an sang leh.

Niyas chuan a hma leh hnung atangin a hlap tla hnem a, Mapuia’n pangngai takin set hmasa berah a thlawp bawk a. Valbuanga, Zodinga leh Vanlalchhantluanga Sailo chuan vaw tlain TNT-in an inthlau lutuk tiziaawm mah se 24-22-a hniam zawk an nih lain Valbuanga’n a hnung atangin line pawnah a hlap chhuak a ni.

Hriam leh zualin set hnihnaah Sihphir an inlan a, Niyas chuan tum li vaw tla zawnin 4-0-in an sang leh nghal a. TNT-in Mizo player-te vuak an dan theih viau lain Indian Navy player an dang hneh lo viau a, point kuaa inthlau chungin Sihphirin set an la zawn.

Set thumnaah thil awm dan a danglam hret a, Valbuanga’n point hmasa ber hmuin an inkhelh chhunga TNT-in hma an hruai hmasak ber a ni a, Albert Zothankhuma’n a vuak sual hnuah 3-2-in an sang leh a. Kawng dik zawh zui thei lovin anmahni thovin hma an hruaina an pawt hniam a ni.

Zodinga’n a service sual hnuah Valbuanga’n a vaw kai lo va, ho taka an hlah bawk avangin 5-3-in Sihphirin an lehpel a, a tawp thlengin hawi kir lovin an sang tluan a. A tawp lamah H Lalrinmawia hlap dang tlain TNT-in 20-18-in an hnaih hman na a, Niyas chuan vawi thum a vuak tlak karlakah Valbuanga leh Lalmama’n an hlap tla thei lo.

Sihphirin kalsanin point khat neih belha chak thei turin 24-18-in an sang a. Lalmama leh Zodinga’n point hmu zawnin Niyas-a vuak an dang tla bawk a, TNT-in tum thum dang thei mah se Kerala spiker chuan an chak nan chiang takin a hlap tla ta tho a ni.

EVERHOME PRO VOLLEYBALL LEAGUE 2025 @ LPS Arena, Falkland

LEAGUE ROUND 4 : RESULT - May 9 (Zirtawpni) Zan

Sihphir def Thutak Nunpuitu Team (mipa)

= 25-22, 25-16, 25-21 (3-0)

Kuriz Player of the Match

= Niyas Abdul Salam (Sihphir)

STATS:

SIHPHIR:

Niyas Abdul Salam: point hmuh 41, point hloh 14

Lalhmunmawia: point hmuh 6, point hloh 4

H Lalrinmawia: point hmuh 4, point hloh 2

Thangminlal Guite: point hmuh 2, point hloh 0

Albert Zothankhuma: point hmuh 2, point hloh 6

H Lalruatsanga (setter): point hmuh 2, point hloh 1

TNT:

Vanlaltanchhana: point hmuh 16, point hloh 6

Zosangzuala: point hmuh 9, point hloh 2

K Zodingliana: point hmuh 8, point hloh 1

Saidingpuia Sailo: point hmuh 4, point hloh 3

Sadrak Fanai: point hmuh 2, point hloh 0 

F Lalhriatpuia (setter): point hmuh 0, point hloh 1

POINT TABLE:

TUICHANGRAL: Play 3, Won 2, Loss 1, Point 6

KHAWBEL: Play 3, Won 2, Loss 1, Point 6

SIHPHIR: Play 4, Won 2, Loss 2, Point 6

THUTAK NUNPUITU TEAM: Play 4, Won 2, Loss 2, Point 6

ANASTASIA ELECTRIC VENG: Play 3, Won 1, Loss 2, Point 3

HUNTHAR: Play 3, Won 1, Loss 2, Point 3

FIXTURE:

MAY 10, 2025 (INRINNI) - 8:00 PM

Anastasia Electric Veng v Khawbel

MAY 12, 2025 (THAWHTANNI) - 8:00 PM

Hunthar v Tuichangral