ZALEN, May 11, 2024: Anastasia Electric Vengin lei rem an rap thar leh a, an player thar, Karthik Madhu-a hovin Inrinni zan EverHome Pro Volleyball League-ah set thum set khatin Khawbel an hneh.

LPS Arena, Falkland-a a inkhelh vawi khatnaah India captain hlui, Karthik chuan point 35 hmuin 17 a hloh a, Laldinsanga, Laldensanga leh Helly Vanlalliana’n Electric Veng team tanpui bawkin 27-25, 25-20, 23-25, 25-22-in an chak.

Player naupang leh beiseiawm, Dinsanga’n tum 20 vaw tlain vawi sarih a tisual a, Pro Volleyball a khelh tawha point a hmuh tam ber a ni a. Densanga’n vawi thum, Helly-a’n tum nga tisualin point 10 ve ve an thawk chhuak a, chakpui thamin Anastasia Mizo player-ten an khel.

Kum ruk hnuah Pro Volleyball-ah Anastasia an kir leh a, Sihphir an hneh loh nghal avangin rin an hlawh zui lo va; mahse, an boruak hniam laiin Tuichangral an hneh a, Ningani zan khan Thutak Nunpuitu Team lakah an tlawm zui leh a ni.

An khelh hmasak vawi thumah Gujarat atanga an lak luh, Yougank Baliyan chuan point 58 hmuin 22 a hloh a, team hotuten an duh khawp lo deuh avangin Karnataka atangin kum 31 mi, Karthik an lak belh a. Indian blocker tha hian Inrinniah Aizawl thlengin zanah a khel nghal a, team a chawi kang.

Mizoram inelna sang bera an tel hmasak berah Khawbelin beiseiawm takin league bul an tan a, set hloh lova Hunthar leh Sihphir an hneh zawn hnuah an player tha, Ashwal Rai chuan a khelh zawm thei lo va. A aiawh tura an lak luh, Tanish Choudhary-a hovin tum hnih an khelhna a ni a, an tlawm zawn.

Chutih laiin India Under 21 team tana khel tawh, Tanish hian Anastasia hmaah point 38 hmuin 11 a hloh a, team chakpui zo lo mah se Kuriz Player of the Match lawman a dawng a. Mizo player-ten Khawbel an pawt hniam a, mi mala che tha ber, Lianlunsang Vaiphei chuan tum sarih vaw tlain point hnih a hloh a, Anastasia Mizo player-te an el zo lo.

Team paruk zinga hniam ber, Huntharin point thum kawlin a dang zawngin point ruk theuh an hmu a, semifinal lut tur a la chiang lo hle a. League khelh khat an la neihah Anastasia-in May 14-ah Hunthar an hmachhawn dawn a, a tuk zanah Khawbel leh TNT an innuai ang.

Anastasia hmaah Khawbelin knockout round lut hmasa ber nih tumin an khel a, Electric Veng team-in beiseina nei zui turin chak an mamawhna a sang ve thung a. Set khatnaah an inum tawk hle a, Kathik chuan hnuhma nei nghalin a vuak tlak hnuah 23-20-in Anastasia an sang hman.

Mahse, Khawbelin nawr letin point thum an hmuh zawn hnuah point khat hmuh belha set la thei turin 25-24-in an sang zui a. Boruak sangah Karthik chuan vaw tlain Anastasia thinphu a tireh a, Dinsanga’n a hlap tlak ve leh hnuah Khawbel talbuai zelin R Lalmalsawma’n a nam sual a, point thum hmu zawnin Electric Veng team an tlang.

Set hnihnaah Karthik a langsar a, a vuak tlak bakah net chungah lehlam vuak dang turin hlawk takin ban a phar a. A hnunga a awm lain Helly chuan lehlam hlap dang ve thungin Tanish tih loh Khawbel Mizo player-ten vuak tlak an harsat a, Lalruatfela Sailo leh Lalhruaizela an talbuai nasa zual.

Vuak sual nei tam ngai lo, Densanga’n a ball hmuh awmze neiin a chhuah a, a vuak tlak rualin 16-11-in Anastasia an sang a. Khawbelin an hnaih zo lo tluan a, Helly-a’n a vuak tlak hnuah 24-10-in Aizawl team-in hma an hruai a, Lalruatsanga’n chiang takin Ruatfela hlap dang tla ve lehin set an la zawn.

Set thum faia chak tlang thei mai turin set thumna tawp lam thlengin Anastasia an fal a, Dinsanga’n a vuak tlak rualin 22-17-in hma an hruai a. A kawtawp atangin Khawbel an infuih phur a, Rodingpuia’n an inkar tizim hretin Dinsanga vuak bakah Karthik-a hlap tum hnih an dang tla zawn zui a, boruak a inthlak.

A kotlang atangin Yougank leh Anastasia player dangten thil thleng a thlir reng a, team siksawi lovin an hnungtawlh zel a. Tanish chuan tum thum vaw tla zawnin 24-23-in Khawbelin hma an hruai let a, Dinsanga hlap dang tla zuiin an pawtthla.

Anastasia an talbuai rei lo va, set linaah insiam thar leh nghalin Karthik chuan a hui tlak hnuah 16-11-in an sang a. Khawbel tan Tanish a tangkai a, an inkar tizim chho hret hretin 22-20-in an hnaih hman.

Mahse, Khawbelin lehlam vuak dan kawngah harsatna an tawk a, Mizo player-ten point an thawk chhuak thei mang lo bawk a, Tanish a rim hle a. Anastasia erawh tute pawhin point an hmu thei zel a, Densanga’n a hlap tlak hnuah Dinsanga’n vaw sual mah se Karthik chuan 24-22-in hma a hruaipui a, Rodinpuia vuak a dang tla zui leh a ni.

EVERHOME PRO VOLLEYBALL LEAGUE 2025 @ LPS Arena, Falkland

LEAGUE ROUND 4 : RESULT

May 10 (Inrinni) Zan

Anastasia Electric Veng def Khawbel (mipa)

= 27-25, 25-20, 23-25, 25-22 (3-1)

Kuriz Player of the Match

= Tanish Choudhary (Khawbel)

STATS:

ANASTASIA:

Karthik Madhu: point hmuh 35, point hloh 17

Laldinsanga: point hmuh 20, point hloh 7

Laldensanga: point hmuh 10, point hloh 3

Helly Vanlalliana: point hmuh 10, point hloh 5

Lalruatsanga: point hmuh 8, point hloh 2

Ramdintluanga (setter): point hmuh 2, point hloh 1

KHAWBEL:

Tanish Choudhary: point hmuh 38, point hloh 11

Lianlunsang Vaiphei: point hmuh 7, point hloh 2

H Malsawmsanga: point hmuh 8, point hloh 7

Joseph Lalbiaksanga: point hmuh 3, point hloh 0

Rodingpuia: point hmuh 4, point hloh 2

David Lalramhmachhuana (setter): point hmuh 1, point hloh 0

POINT TABLE:

TUICHANGRAL: Play 3, Won 2, Loss 1 (set lak 7, set hloh 4) : Point 6

KHAWBEL: Play 4, Won 2, Loss 2 (set lak 7, set hloh 6) : Point 6

ANASTASIA ELECTRIC VENG: Play 4, Won 2, Loss 2 (set lak 8, set hloh 8) : Point 6

SIHPHIR: Play 4, Won 2, Loss 2 (set lak 7, set hloh 7) : Point 6

THUTAK NUNPUITU TEAM: Play 4, Won 2, Loss 2 (set lak 7, set hloh 7) : Point 6

HUNTHAR: Play 3, Won 1, Loss 2 (set lak 3, set hloh 7) : Point 3

FIXTURE:

MAY 12, 2025 (THAWHTANNI) - 8:00 PM

Hunthar v Tuichangral (mipa)

MAY 13, 2025 (THAWHLEHNI) - 8:00 PM

Luangmual v Bungkawn (hmeichhia)