LPS Arena, Falkland-ah a khatin mipui an pung khawm a, Zosangzuala (Lalmama) chuan TNT fuih phurin set thumnaah 22-16-a sang fal tawh Tuichangral an pawtthla a, inelna sangah fiahna pal tlangin 25-22, 17-25, 25-23, 19-25, 16-14-in an chak.

Season liam ta khan TNT-in league leh semifinal-ah Tuichangral an hneh ve ve. Tun season-ah player chhuak leh lak luh langsar awm lovin December khan MVA Cup-ah an champion a, group league-ah 3-2-in Tuichangral an hneh hram a, final-ah intawng lehin set hloh lova chakin an champion.

Hunthar hmaa chiang taka an tlawmna chhang letin TNT-in an mamawh hnehna an chang a, Lalmama'n hmun pawimawh luahin point li chiah hlohin 23 a thawk chhuak a, Kuriz Player of the Match lawmman a dawng.

Taksa lamah TNT innghahna ber ni thin Vanlaltanchhana a inpeih tawk lo chungin point 18 hmuin tum kua a tisual a, khelmual kotlanga anmahni au phurtute beiseina tihlawhtlingin team boruak tha an nei thar leh a, inpumkhat tha takin lehlam an nawr thei.

2022 Pro Volleyball-ah Tuichangralin 3-1-in league-ah TNT hneh mah se tun kum hnih chhungin an lakah harsatna an tawk. Inrintawkna an neih san lai takin an fimkhur tawk lo va, ball vuakah el tham ni chung siin tihsual an ngah a, inelna hrang hranga an insut hnuhnun vawi ngaah Muanna Veng team an chak vek.

Chhinga Veng an hneh tuma a tira lut zinga tel lo Lalbiakmuana'n hun pumin Tuichangral tan a khel a, point 17 hlawhin point li a paih laiin Sonu chuan vawi 28 vaw tla mah se tum 20 a tisual a, a khelh hmasak a pha lo. Zomuansanga'n point 13 hlohin vawi 21 a hlap tla a, Vanlaltanpuia'n point 13 hmuin pont hnih chiah a hloh a, team an chakpui zo lo.

TNT setter Lalliankima'n Lalmama hnenah ball a pe hnem a, a hlap tlak hnuin Tuichangral spiker Zomuana'n a vaw kai lo zui ve leh a, set khatnaah 16-12-in hma an hruai. A hnuah Zomuana'n hlap tlain 20-20 ni leh hman mah se, hun pawimawhah Valbuanga'n a theihna lantirin 24-22 a nih laiin tha takin a vaw tla.

Tuichangral player-ten danglamna siam turin vuak tlak mai an awlsam a, set an hloh hnuah insiam remin inkhel an thunun hneh hle. TNT nawr tawmin set hnihna an lak hnuah harsa lo taka set hnih la zawn thei turin point rukin an sang a, point thum hmuh belh chiah an mamawh.

Hun khirh takah TNT-in champion ni awm rengin an bei let a, Sadrak Fanai chuan vaw tlain Lalmama hovin phui takin net chungah lehlam an dang zui. Tuichangral rinrawl Zomuana leh Sonu chuan an hlap tla thei mai lo va, 22-22 a ni chho.

Zomuana'n vaw tlain Tuichangral an sang zui leh na a, boruak sangah lehlam an nghet zawk. Lalmama'n a hlap tlak hnuah khaw chhak team setter C Zonunmawia'n a tisual a, TNT-in tlang turin point khat chiah neih belh an mamawh laiin Saidingpuia Sailo chuan point a hloh a, khelmuala hun a hman chhungin vawi ruk a vuak tlak zat chiah point a hloh a ni.

Set linaah Tuichangral kir lehin Biakmuana, Zomuana leh Sonu bakah rang taka ball hniam vawtu Tpa te an inkawp fuh leh a, TNT-in an ngam lo. Mahse, an insawrbing rei thei lo va, set nganaah boruak a danglam thar leh.

An chak tur tihfelna hnuhnungah talbuai hmasain 9-4-in Tuichangral an hniam a, Zomuana'n point hmu zawn chhovin 12-10-in an sang ve leh a, chak tlang thei turin hmabak an ngah tawh lo. Rilru lamah TNT-in an paukhauh tih lantir ve thungin Lalmama'n Sonu-a vuak a dang tla a, 13-12-in an lehpel.

14-14 thlengin Tuichangralin nih rual leh thei mah se Valbuanga'n vaw tlain TNT-in point hmuh belha chak thei dinhmun an luah. Khaw chhak team-in point an hmuh let theihna hun tha hlohin Laldinchhunga'n remchang a neih phah a, fuh zeta a hlap tlak rualin league kal meka a vawi khat nan champion lai an chak.

An chak theih K Zodingliana'n hloh nei lovin point kua a hmu a, Sadraka'n point kua ve tho thawk chhuakin tum thum a tisual a, team pum puiin hma an sawn. An khelh that laiin Tuichangral an khawng hle a, chutih rualin team el tham lakah an nghet tawk lo tih a lang.

Zuamawm an nih hnuah TNT-in lei rem an rap thar leh a, khelh hnihah league point hnih kawlin inrinniah Durtlang North an khelhpui leh dawn. Tuichangralin set hnih an lak ve avangin point khat an neih belh a, league point li thawk chhuak tawhin May 11-ah an inlan leh dawn a, Durtlang North an hmachhawn ang.

STATS

TNT

Zosangzuala : point hmuh 23, point hloh 4

Vanlalṭanchhana : point hmuh 18, point hloh 9

K Zodingliana : point hmuh 9, point hloh 0

Sadrak Fanai : point hmuh 9, point hloh 3

Laldinchhunga : point hmuh 6, point hloh 5

Lalliankima : point hmuh 2, point hloh 1

Vanlalchhantluanga : point hmuh 1, point hloh 0

Ramdinpuia : point hmuh 4, point hloh 4

TUICHANGRAL

Lalbiakmuana : point hmuh 17, point hloh 4

Sonu : point hmuh 28, point hloh 20

Zomuansanga : point hmuh 21, point hloh 13

Vanlalṭanpuia : point hmuh 13, point hloh 2

Saidingpuia Sailo : point hmuh 6, point hloh 6

Lalhmunmawia : point hmuh 3, point hloh 4

C Zonunmawia : point hmuh 3, point hloh 5

POINT TABLE

TUICHANGRAL : Play 2, Won 1, Loss 1, Point 4

HUNTHAR : Play 1, Won 1, Loss 0, Point 3

DURTLANG NORTH : Play 1, Won 1, Loss 0, Point 3

THUTAK NUNPUITU TEAM : Play 2, Won 1, Loss 1, Point 2

HLIMEN : Play 1, Won 0, Loss 1, Point 0

CHHINGA VENG SPIKERS : Play 1, Won 0, Loss 1, Point 0

FIXTURE

May 1, nilaini 8:00pm :

LUANGMUAL V DIAKKAWN (hmeichhia)

May 2, ningani 8:00pm :

HUNTHAR V CHHINGA VENG SPIKERS (mipa)

May 3, zirtawpni 8:00pm :

DIAKKAWN V BUNGKAWN (hmeichhia)

May 4, inrinni 8:00pm :

THUTAK NUNPUITU TEAM V DURTLANG NORTH (mipa)