Luangmualin an la tawn ngai loh boruak danglam hnuaiah an hneh tawh, Bungkawn an hmachhawn dawn a, Inrinni zan hian Tata SK 712 Pro Volleyball League semifinal an khel ang.

Mizoram volleyball inelna sang bera an tel vawi khatnaah Luangmualin an khelh apiangah rin an hlawh telh telh a, derthawng lova an elpui team panga hneh vekin knockout round an inhlangkai a ni.

Hmeichhe team zinga Mizoram pawn atanga player la lut awm chhun an nih angin an thatpui hle a, Gujarat tleirawl, Nipa Barad chuan vawi nga a khelh tawhah point 142 hmuin 67 a paih a, mi malin a thawk chhuak tam fal a, ani bakah Luangmualin 2019 Pro Volleyball player tha ber, Lalmuanpuii leh khelh khata point 10 chuang hlawh chhuak thei Hmingthazuali an kawl bawk.

League-ah set hloh lovin Bungkawn an hneh tawh avangin Inrinni zanah rin hlawh zawk ni chungin R Dengthuama Indoor Stadium, Mualpuiah an inlan dawn a, chutih laiin Pro Volleyball semifinal an khelh vawi khatna tur a ni a, boruak danglamin a tlakbuak tel ngei dawn a ni.

2019 leh 2022-ah Bungkawnin final lut zawn ve vein an champion zo lo ve ve a, tun tumah rin hlawh khawpin an khel phak lo va; mahse, tawn hriat nei zawk an nihna chhawr turin an hmachhawn dawn a ni.

Luangmual an hneh loh tumin F Lalparmawii’n point 18 hmuin tum nga a hloh a, team chakpui zo lo mah se khelh tha bera thlan a ni a, vawi thum final lut zawn turin team pum puiin hmasawn an mamawh a, player tin a tha thei ang berah an inlan a tul dawn a, net bulah lehlam ball vuak dang thei turah an thawh rim a ngai tel viau dawn bawk a ni.

Semifinal atangin Mizoram Volleyball Association chuan venhimna leh inthununna tha zawka kalpui a nih theih nan bakah inelna hlutna a sang zel avangin a hmuna inkhel enna ticket pakhat Rs. 100-a hralh chhuah a ni dawn tih an puang a, inkhelh tur club hnenah ticket 100 zel a thlawnin an pe chhuak ve thung a ni.