ZALEN, May 29, 2026: Semifinal luh ngei tuma Khawbel insensonain awmzia a nei a, Ningani zanah set thum set khata Sihphir an hneh rualin Mizoram Rural Bank Pro Volleyball League knockout round lut thei turin rahbi pawimawh tak an tuk.

Vawi li ve ve an khelhah Khawbel leh Sihphirin point nga ve ve an hmu a, a hniam pathum zingah tel ve ve chungin an inhmachhawn a. League khelh hnih an la neihah Khawbelin team tichak turin Tamil Nadu atangin Indian player hriat hlawh, Angamuthu Ramaswamy an la lut a, Nilaini khan Mizoram a lo thleng.

Feet 6 leh inchi 9-a sang hian Khawbel tan a khelh hmasak berah vawi 47 vaw tlain point 14 a hloh a, Kuriz Player of the Match-a thlan nghal ni mah se team captain leh amah thlawp thei ber, Johan Vanneihsanga a hlan chhawng a, Johan-a hian tum li tisualin point 18 a hmu.

Khawbel hian Delhi spiker Anurag Rawat kawl tho chungin team tha leh khawng zawk neih tumin an insengso va, Sihphir hmaah a rah hmasa an seng nghal.

Khelmuala lut player paruk zingah team pakhatin Zo hnathlak ni lo Mizoram pawn player pakhat bak an chhawr thei lo va, nikumah Anastasia Electric Vengin championship tan hmain Yougank Baliyan an la lut a, league an khelh zawh hmain Karthik Madhu neih belhin an champion.

Khawbelin Pro Volleyball League-a tawn hriat nei tha, Anurag awltirin Angamuthu an luttir nghal a, a ball vuakna a san avangin Sihphirin an dang hneh lo hle a, harsa lovin set hmasa pahnih an la zawn.

A zuan hnem avangin set thumnaah a tla hniam a, Sihphir tan set lakna kawng a inhawng a. Set lina laihawl thlenga an hahchawlhtir hnuah an dah lut leh a, inelna nasa leh boruak sangah dinchangin vawi ruk an deuce hnuah an tlang.

An chak rualin Khawbelin point riat hmuin pathumnaah an insawn chho a, Thawhlehniah league kharin tla chiang sa tawh, Thutak Nunpuitu Team nen an inkhel ang.

Sihphirin set thumna an lak hnuah point sarihin hma an hruai zui a, an keng tlang zo lo va. Point nga kawl zui zelin khelh khat la nei mah se semifinal luhna kawng a ping hle tawh a, karleh Ninganiah Tuichangral nen inkhelin league an khar dawn a ni.

Niyas Abdul Salam chuan vawi 40 vaw tlain point 10 a hloh a, Sihphir tan innghahna tlingin khel mah se Mizo player-ten an thlawp hneh tawk lo va. Tum dang aia hriamin Lalramhluna a inlan na a, ball an pe tam lo a, tum 10 hlap tlain vawi khat chiah a tisual a, mi dang point 10 thawk chhuak phak an awm lo. 

Inkhel an tan rualin team inbeihna ni mah se player pahnih inelna a ni tel a, Khawbel spiker thar Angamuthu chuan sang tak atanga a hlap tlak theih avangin Niyas a hliah khuh a, set khatnaah vawi khat mah Sihphirin a vuak an dang tla lo va. Johan-a’n a ball hmuh awmze neiin a chhuah thei bawk a, Khawbelin derthawng lovin set an la zawn.

Set thumnaah erawh thil thlen dan a danglam a, khelmual kotlanga thlawptu nei tha leh au taima zawk, Sihphir tantuten team an tanpui a. Angamuthu-a vuak dang tla nghalin point hmasa ber an hmu a, Albert Zothankhuma’n point hnih hmu zawnin a hnauh Niyas chuan mittlung takin a khel a, anmahni tantute a chawk phur leh zual.

Set hmasa pahniha zuang hnem tak, Angamuthu chuan vaw lovin a hui ta fo a, Khawbel an hnungtawlh laiin harsatna an tawh belh a, lehlam vuak dang tura a laia zuang taima tak, Lalhunthara’n a hlap kai loh rualin a ke a rap sual a, a khel zawm thei lo.

Sihphir innghahna, Niyas chuan vaw tlain 15-11-in an sang a; mahse, a khel a tinat avangin a khelh zawm theih loh mai a hlauhthawnawm a, Sihphir tantute thinphu a rang hman a. Chhuak lovin eng emaw chen hnuah ngai a awh leh a, a chet that theih loh laiin Ramhluna’n rin tlakin a ball hmuh a vaw tla a, phu takin set thumna an la.

Khawbelin Angamuthu thlakin set lina an tan rualin Anurag an luhtir a, lehlamin team boruak tha chhawm nungin Niyas chuan vawi thum a vuak tlak laiin Anurag-a’n point hnih a hloh bakah Johan-a’n a hlap kai lo va, set la zawn thei turin Sihphirin 8-1-in hma an hruai a; mahse, an tawn san laiin an insawrbingna an hloh va, Khawbel insiam thain Anurag leh Johan-a ten team an nawr kal a, an inum tawk chho hle.

A hahdam hnuah Angamuthu kir lehin 16-16 a nih laiin Anurag a thlak a. Niyas nen an inelna boruak a sang zui hle a, 24-24 a nih laiin Vanlalawmpuia’n rang takin a vaw tla a, point khat hmuh belha set la thei turin Sihphirin hun tha an nei hmasa.

Angamuthu chuan dangin Niyas nen an invuak tlak chhawk a, 29-29 a nih laiin Johan-a’n a hlap tla a, Sihphirin an chhan let theih loh hnuah Khawbel captain hian a vaw tla nawn a, championship kal meka set rei ber an lak rualin hlim takin hnehna an lawm zui thei.

Season liam ta khan uiawm takin Sihphir an tla tawh a, league-a palina TNT nen an point hmuh, set lak leh hloh inang vek chungin tehna dangah an hniam hret avangin an tlang pha lo chiah a, kum zawna tlak hmabakin Khawbel hmaah hnual takin khelmual an chhuahsan.

MIZORAM RURAL BANK PRO VOLLEYBALL LEAGUE 2026

May 11 - June 13, 2026 @ LPS Arena, Falkland, Aizawl

RESULT - Round 5 : May 28, 2026 (Ningani)

Khawbel def Sihphir (mipa)

25-20, 25-21, 22-25, 31-29 (3-1)

Kuriz Player of the Match - Angamuthu Ramaswamy (Khawbel)

Cheetak Fan of the Night - Zothlamuanpuia (Sihphir)

MVA Lucky Fan - Lalthantluangi (Khawbel), Angaihi (Sihphir)

STATS:

KHAWBEL

Angamuthu Ramaswamy: Point Hmuh - 47, Point Hloh - 14

Johan Vanneihsanga: Point Hmuh - 18, Point Hloh - 4

Anurag Rawat: Point Hmuh - 7, Point Hloh - 4

Lalhunthara: Point Hmuh - 2, Point Hloh - 0

Lalremfela Point Hmuh - 5, Point Hloh - 1

David Lalramhmachhuana (setter): Point Hmuh - 1, Point Hloh - 0

SIHPHIR

Niyas Abdul Salam: Point Hmuh - 40, Point Hloh - 10

Lalramhluna: Point Hmuh - 10, Point Hloh - 1

Albert Zothankhuma: Point Hmuh - 9, Point Hloh - 5

Lalneihpuia Hrahsel: Point Hmuh - 8, Point Hloh - 1

Vanlalawmpuia: Point Hmuh - 7, Point Hloh - 2

F Lalhmingmawia (setter): Point Hmuh - 3, Point Hloh - 2

POINT TABLE:

ANASTASIA: Play 5, Won 3, Loss 2 (set lak 13, set hloh 8) : Point 11

HUNTHAR: Play 4, Won 3, Loss 1 (set lak 11, set hloh 1) : Point 10

KHAWBEL: Play 5, Won 3, Loss 2 (set lak 10, set hloh 10) : Point 8

TUICHANGRAL: Play 4, Won 2, Loss 2 (set lak 9, set hloh 8) : Point 6

CHHINGA VENG: Play 4, Won 2, Loss 2 (set lak 9, set hloh 9) : Point 6

SIHPHIR: Play 5, Won 2, Loss 3 (set lak 8, set hloh 11) : Point 5

TNT: Play 5, Won 1, Loss 4 (set lak 5, set hloh 13) : Point 2

FIXTURE (Mipa) - Round 6

May 29, 2026 (Zirtawpni)

8:00 PM : Chhinga Veng Spikers v Tuichangral 

May 30, 2026 (Inrinni)

8:00 PM : Hunthar v Anastasia Electric Veng