ZALEN, Apr. 28, 2025: Thawhlehni zana Mizorama volleyball inelna ngaihhlut hlawh leh sang ber, Pro Volleyball League 2025 khelh tan turah mipa team ruk zingah Thutak Nunpuitu Team (TNT) chiahin state pawn player an nei lo va, heti chung hian Mizo hlanga an champion kum ang maiin kuminah pawh an inpeih niin club hruaituin a sawi.

TNT hian a vawi hnih nan Mizo hlanga champion tumin fiahna an hmachhawn dawn a, EverHome Pro Volleyball League inkhel hmasa berah Tuichangral nen an innuai nghal dawn.

LPS Arena, Falkland-ah Thawhlehni zan dar 08:00-ah tan a ni dawn a. TNT tih loh team dang panga - Tuichangral, Khawbel, Sihphir, Anastasia Electric Veng leh Huntharin squad tichak turin state pawn atangin player an la lut vek a, Pro Volleyball-a tawnhriat nei tawhte leh vawi khat inlanna tur an awm bawk.

TNT club hruaitu, Vanlalmuanpuia chuan kum 2023-a Mizo hlanga an champion kum ang mai khan an player-te an inpeih niin a sawi a. Season kal mekah Pro Division inelna vawi hnih neih tawhah hma an sawn hle tih khelmualah an lantir tawh.

October khan an hmunpui, Muanna Veng-ah 2024-25 season tanna, Mizoram Volleyball Association (MVA) Invitation Cup an thleng a, semifinal-ah tlain Tuichangralin 3-0-in an hneh a; mahse, thla liam ta khan Lungleiah MVA Cup an inchuh a, inkhel zawng zawngah chak fai vekin an champion a, an elpui lian Tuichangral nen tum hnih intawngin 3-1 ve vein an hneh a ni.

Kum hnih kal ta kha TNT vanglai a ni a, Vanlaltanchhana, Zosangzuala (Lalmama), K Zodingliana, captain Vanlalchhantluanga Sailo, Laldinchhunga leh setter Lalliankima’n rahbi thar tukin Pro Volleyball chanchina Mizo hlanga champion thei awm chhun an ni.

Season liam taah an tla hniam viau a, Mizoram inelna sang berah final an lut pha lo va. Tun season-ah Tuichangral atangin spiker Saidingpuia Sailo la lutin Northeast Khawdungsei rawlthar, Lalsaitluanga chu rinrawl atan an hmang chho bawk.

Tlangsam player pahnih, Dinchhunga leh Liankima an chhawr mumal thei lo va, Pro Volleyball squad-ah pawh an tel lo va; mahse, MVA Cup-ah setter atan F Lalhriatpuia hmangin a rintlak tih a chiang tawh a, coach Lalhmangaihsanga Sailo chuan ‘Mizo hlanga champion leh tumin theihtawp an chhuah dawn’ tih a sawi.

TNT tan a vuak lamah Valbuanga’n a thawhhlawkin an innghahna pawimawh a ni a, chutih rualin a vuak lama team tha leh hriam ber an ni hran lo va. Lehlam hlap dan kawngah erawh fak an hlawh a, 2024 Best Blocker Lalmama bakah Zodinga an nei a. Team boruak tha leh lehlam hlap an lak theih avangin an dingchang fo va, an chakna thuruk pawimawh tak a ni.

Kum 2016-ah Pro Volleyball buatsaih tan a ni a, tun hi a vawi riatna niin mipa team zinga la tel kim vek pahnih zingah TNT an tel a; 2016-ah final lutin Anastasia an hneh lo va, 2023 final-ah Hunthar an hneh ve thung.

TNT SQUAD:

1. Lalpekmawia

2. Saidingpuia Sailo

3. Lalsaitluanga

4. Malsawmtluanga 

5. Sadrak Fanai

6. K Zodingliana

7. Lalrammawia

8. Zosangzuala

9. Vanlalțanchhana 

10. F Lalhriatpuia

11. Vanlalchhantluanga Sailo

12. Ramdinpuia

Coach: Lalhmangaihsanga Sailo

Assistant Coach: Vanramliana, Lalhmangaihzuala