PRO VOLLEYBALL: State pawn player pali ziak lut Tuichangralin an hun tha a her chhuah tawh beisei

ZALEN, Apr. 29, 2025: Mizorama volleyball inelna sang ber, Pro Volleyball chu Thawhlehni zanah tan a ni dawn a, team hmuhnawm leh tha ber pawl, Tuichangral chuan champion ngei tumin state pawn player pali an la a, final vawi hnih lut tawh hian an tan hun tha a her chhuah tawh ngei an beisei.

A vawi khat nan Pro Volleyball champion nih tumin Tuichangralin chona thar an hmachhawn dawn a, coach David Aizampuia Fanai chuan insiam thatna tur an neihte siam tha turin an inbuatsaih tih a sawi a, an tan hun tha a inher chhuak tawh ngei a beisei.

Kum 2018 atangin Mizoram inelna sang berah Tuichangral an tel a, final lut nghalin Hunthar an hneh zo lo va. Nikumah a tum hnih nan final an lut leh a, Hunthar bawk hneh lovin pahnihna an ni leh.

Pro Division season kal mekah Tuichangralin title chuh phak team an neih bakah an player neihte atangin rin an hlawh a, 2024 Pro Volleyball Best Spiker Zomuansanga bakah Johan Vanneihsanga leh tawnhriat nei tha, Lalbiakmuana an kawl a, setter C Zonunmawia, Vanlaltanpuia leh R Vanlalmawia te an kawl bawk a ni.

Tun season-ah bul an tan tha a, Invitation Cup champion an ni nghal a; mahse, hma sawn zui lovin thla liam ta khan Mizoram Volleyball Association (MVA) Cup-ah Thutak Nunpuitu Team (TNT) an ngam lo hle a, vawi hnih an khelhah 3-1 ve vein an tlawm.

Pro Volleyball League tan turah a bul tan nan TNT bawk an hmachhawn nghal dawn a, team tichak turin an squad-ah state pawn player pali an ziah luh zingah nikum Pro Volleyball-a an hman tawh, Sonu pawh a tel.

Tuichangral hian Mizo player tha leh thiamna chi hrang hranga ball hlap tla thei an kawl nual a; mahse, net bula lehlam vuak dang thei tur an nei tha tawk lo nia ngaih thin an ni a. Pro Volleyball League an khelh tawhah beisei ang takin an khel chhuak zo lo fo a, hun pawimawhah an tlo tawk lo thin.

Team nungchang puitling tawk lo avangin vuak sual leh ho deuha point hloh an neih phah niin a hriat bawk a, chung zawng zawngah chuan insiam thaa champion nomawi la ngei thei turin an inbuatsaih tih coach chuan a sawi.

Pro Volleyball League-ah hian duh zat zat state pawn player lak theih a ni a; mahse, khelmualah a rualin pakhat aia tam an khel thei lo thung.

TUICHANGRAL SQUAD:

1. Lalbiakmuana

2. Zomuansanga

3. C Zonunmawia

4. H Lalramdinmawia

5. Johan Vanneihsanga

6. Vanlaltanpuia

7. R Vanlalmawia

8. Jony Lalremruata

9. PC Lalthazuala

10. Rochamliana Sailo