ZALEN, May 17, 2025: Tanish Choudhary chuan point 46 thawk chhuakin a vawi khat nan Khawbel a chakpui a, Zirtawpni zan EverHome Pro Volleyball League inkhel pawimawhah set thum set khata Thutak Nunpuitu Team an hneh rualin semifinal an lut.

LPS Arena, Falkland-ah Khawbelin set hmasa pahnih an la zawn a, an tlakfual hnuah kir lehin Tanish chuan point 14 hloh mah se filawr takin a khel a, 25-22, 25-20, 18-25, 25-20-in TNT an hneh.

Team pahnihin league an khelh zawhna a nih mai bakah a chak zawkin knockout round an lut dawn tih hre chungin an inhmachhawn a; season kal mek Pro Division inelna hrang hranga an intawn vawi hnihna ni nghalin, March khan Mizoram Volleyball Association (MVA) Cup-ah TNT-in set thum set khatin an hneh tawh.

Pro Volleyball-a an tel hmasak berah Khawbelin bul an tan fuh chho hman a, Indian blocker tha, Ashwal Rai la lutin set thum fai ve vein Hunthar leh Sihphir an hneh zawn a. An chhawr zui theih loh avangin India Under 21 team-a khel tawh, Tanish an la lut leh a, a hovin Tuichangral leh Anastasia Electric Veng lakah an tlawm zawn.

Tanish hian a khelh hmasak berah Tuichangral hmachhawnin vawi 20 a vaw tla a, point kua a hloh va. Anastasia lakah point 38 hmuin 11 a hloh zui leh a, a team-te chakpui zo lo mah se Kuriz Player of the Match-a thlan a ni.

TNT hmaah a theihna chiang leh hriam leh zualin a lantir a, championship kal mekah hnuhma thar hnutchhiahin inkhel vawi khata mi malin point an hmuh tam ber a ni a, khel tha ber lawmman a dawng nawn leh.

Sihphir spiker Niyas Abdul Salam chuan TNT an hneh tumin point 14 hlohin 41 a hmu tawh a, Tanish hi point 40 tlin thei pahnihna a nih rualin point hloh inangah Niyas aiin point ngain a hmu tak zawk a ni.

Khawbel tan a khelhpui zingah mi mala point nga aia tam hmu pha an awm lo a, Zonunsanga leh Lianlunsang Vaiphei chuan point nga ve ve hlawhin tum hnih leh vawi thum an tisual a; setter David Lalramhmachhuana’n hmun pawimawh luah ve thungin tha taka ball a vawrh bakah point nga a thawk chhuak.

2023 champion TNT tan Vanlaltanchhana’n tum 28 hlap tlain point riat a hloh a, Zosangzuala’n point 14 hmuin tum nga a tisual a, Saidingpuia Sailo chuan vawi 10 vaw tla mah se point riat a paih a. Fak an hlawh thinna, net chunga lehlam dan kawngah Tanish an veng hneh lo a, an ball vuak Khawbelin an dansak hnem viau bawk.

Team paruk inel zinga state dang atanga player la lut ve lo awm chhun, TNT hian a vawi hnih nan Mizo hlanga champion an tumna kawngah harsatna lian tak an tawk a, an khelh hnuhnun tum hnihah tlawm zawnin semifinal lut pha lova tlak an hmabak.

Inrinni zanah mipa league zawh fel a ni dawn a, point kua kawla tlang chiang sa tawh, Tuichangralin set thum faiin Sihphir an hneh a nih chuan TNT tan kawng a inhawng thei a. Point ruk ve ve nei chungin Sihphir aiin set an lak leh hloh danah dinhmun tha zawk an luah thei a, chubak beisei tur a awm tawh lo.

Khawbelin hun pawimawhah ruahmanna tha tak nen TNT an hmachhawn a, set khatnaah team pahnih rinrawl ve ve, Tanish leh Valbuanga an inel tawk viau a, a hnung leh hma atangin ball an hmuh an hlah mang lo va. Khawbelin 15-10-a hma an hruai hnuah Valbuanga’n hlap tla zawnin Tanish chuan a vaw kai lo ve thung a, 16-16-in an intluk.

Sadraka leh Saitea’n point an hloh hnuah TNT an hnungtawlh leh a. David-a’n Tanish-a hnenah zel ball pein 20-18-a sang zawk an nih atanga set hmasa ber an lak thlengin vawi nga a vaw tla a. Valbuanga’n tum hnih hlap ve thungin a chhang let hneh lo a, 24-22 a nih laiin Tanish-a hlap vawi khatna laksak thei mah se a vuak nawn leh erawh an dang hneh ta lo a ni.

Set hnihnaah Tanish leh Zonuna’n TNT khawlpui ber, Valbuanga an veng dun a, Khawbelin chet an awlsam phah a. Zonuna’n Valbuanga vuak a dansak hnuah Tanish leh Lalruatfela Sailo chuan point an hmu zawn a, TNT-in vuak tlak an harsat a, Ramdinpuia hlap an dan thlak rualin Khawbelin 18-11-in an kalsan.

TNT-in chhaih buai tur khawpin hnaih zui tawh lo va, Saitea’n a hlap tlak hnuah 23-20-in an inkar zim leh deuh mah se Tanish chuan harsa lova set an lak zawn nan net bul atanga a vuak tlak hnuah a hnung atangin a vaw tla zui leh a ni.

Set thumna an tan rualin TNT an derthawng a, infuih tharin nasa leh zualin Tanish an ven bakah daihzai zawkin an khel a. Net bula lehlam vuak dangtu ber, Lalmama’n awmzia a neih rualin team boruak a kang a, Tanish-a hlap tum thum an dan zawnsak hnuah Valbuanga’n point thawk chhuakin 17-11-in an sang.

Zuang hnem tak, Tanish a tlak hniam avangin Khawbelin an nawr let thei lo va, point 18 chiah an hmu ve hman tihin Saitea leh Valbuanga’n an vaw tla zawn a, TNT-in set an lak ve rualin inkhel boruak a nung thar hle.

Set lina tirah Khawbelin tan hmun siam remin Tanish chuan Saitea vuak a dang tla a, Valbuanga hlap an dang zui bawk a. H Malsawmsanga’n point a hmuh hnuah 10-4-in an sang a, TNT hmabak a thim hman viau tihin Valbuanga’n vawi thum a vaw tla zawn a, Tanish chuan point thum a hloh zawn ve thung.

TNT-in 10-10-in an nih rual a, Khawbel coach Vanlalmawia’n Tanish la chhuakin a hahchawlhtir a, 14-11-in Muanna Veng team-in an kalsan hman a. TNT-in ho taka point an hloh hnuah Valbuanga’n a vaw kai lo va, Tanish rawn lut lehin a hlap tla nghal a, 15-15-in an intluk leh.

Inum chhovin 20-20 a nih hnuah Khawbel an hriam a, boruak sangah anni aia tawn hriat nei tam TNT beiseina an dang bet a. Tanish chuan tum thum hlap tlain Valbuanga’n point hnih a hloh zawn ve thung a, point nga an hmuh zawn hnuah hlim takin hnehna an lawm zui a ni.

EVERHOME PRO VOLLEYBALL LEAGUE 2025 @ LPS Arena, Falkland

LEAGUE ROUND 5 : RESULT

May 16 (Zirtawpni) Zan

Khawbel def Thutak Nunpuitu Team (mipa)

= 25-22, 25-20, 18-25, 25-20 (3-1)

Kuriz Player of the Match

= Tanish Choudhary (Khawbel)

STATS:

KHAWBEL:

Tanish Choudhary: point hmuh 46, point hloh 14

Zonunsanga: point hmuh 5, point hloh 2

Lianlunsang Vaiphei: point hmuh 5, point hloh 3

Joseph Lalbiaksanga: point hmuh 3, point hloh 1

Rodingpuia: point hmuh 1, point hloh 3

Lalruatfela Sailo: point hmuh 4, point hloh 4

David Lalramhmachhuana (setter): point hmuh 5, point hloh 2

TNT:

Vanlaltanchhana: point hmuh 28, point hloh 8

Zosangzuala: point hmuh 14, point hloh 5

K Zodingliana: point hmuh 4, point hloh 3

Saidingpuia Sailo: point hmuh 10, point hloh 8

Ramdinpuia: point hmuh 2, point hloh 1

Sadrak Fanai: point hmuh 1, point hloh 2

F Lalhriatpuia (setter): point hmuh 3, point hloh 3

POINT TABLE:

* TUICHANGRAL: Play 4, Won 3, Loss 1 (set lak 10, set hloh 4) : Point 9

* KHAWBEL: Play 5, Won 3, Loss 2 (set lak 10, set hloh 7) : Point 9

* ANASTASIA ELECTRIC VENG: Play 5, Won 3, Loss 2 (set lak 11, set hloh 9) : Point 9

SIHPHIR: Play 4, Won 2, Loss 2 (set lak 7, set hloh 7) : Point 6

THUTAK NUNPUITU TEAM: Play 5, Won 2, Loss 3 (set lak 8, set hloh 10) : Point 6

HUNTHAR: Play 5, Won 1, Loss 4 (set lak 3, set hloh 13) : Point 3

* semifinal lut tawh

FIXTURE:

MAY 17, 2025 (INRINNI) - 8:00 PM

Tuichangral v Sihphir (mipa)

MAY 19, 2025 (THAWHTANNI) - 8:00 PM

Jimmy Kanan v Luangmual (hmeichhia)