Thutak Nunpuitu Team-in an duhthusam tipuitlingin Zirtawpni zan Tata SK 712 Pro Volleyball League final-ah 3-2-in Hunthar an hneh a, a vawi khat nan an champion.

Mualpuiah R Dengthuama Indoor Stadium chhunga leng lo mipui an pung khawm a, set la hmasa zawk, TNT hnungtawlhin Huntharin 2-1-a hma an hruai hnuah ropui takin an kir leh a, 25-17, 20-25, 20-25, 27-25, 15-10-in an chak.

Vanlaltanchhana (Valbuanga) chuan hun pawimawhah TNT tanpuiin vawi kua tisualin point 34 a hmu a, championship chhunga vawi sarih an khelhah a tum ruk nan D3 Business Player of the Match lawmman a dawng.

Feet 6 leh inchi 2-a sang, Kawnpui tlangval hian an champion theihna kawngah point 176 thawk chhuakin 53 a hloh a, Best Spiker-a thlan a nih bakah nikum ang bawkin mi mal chawimawina hlu ber, KT Enterprise Mizo Best Player a ni leh a, Panasonic refrigerator hlan a ni.

Tlangsam player Laldinchhunga’n vawi 17 vaw tlain point nga a hloh a, rin tlaka a khelh laiin final vawi thum an luhnaah tum thum tlawm mai thei turin TNT an derthawng hman a. Set lina an hloh a nih chuan Huntharin sulhnu tha tak an neih tawh chhawm nungin final vawi thum an khelhah an chak vek dawn a ni.

June 21 khan league-ah intawngin TNT-in set thum set khatin an hneh tawh a. An intawn nawn lehnaah chungnung nghal mah se point khat hmuh belha set khatna la an nih lai 24-14 hnuah point thum an hloh zawn.

2017 leh 2018 champion Huntharin nawr letin Punjab police Gagandeep Singh leh Zomuansanga bakah Lalruatfela Sailo chuan kawng dikah an hruai a. Set hnih la zawnin semifinal-a an team boruak tha tak kha an nei thar leh.

Nikum final-ah Durtlang North hneh lovin TNT an tlawm a, player-ten hun harsa leh khirhah an puitling tawh tih an lantir a tul a. Set linaah insiam rem lehin point khat hmuh belhah set la thei turin 24-22-in hma an hruai.

Mahse, Lalnunfela leh Gagan chuan vaw tla zawnin Huntharin an nih rual a, hun tha an neihah TNT-in tlang mai an harsat a. Vawi hnih deuce-in rilru lama fiahna nasa tak karah Valbuanga’n a vaw tla a, 26-15-a an san laiin lehlam spiker Gagan chuan a hlap kai lo a, inkhel boruak a inthlak.

A chak tur tihfelna hnuhnung set nganaah boruak ritin Hunthar a delh ve thung a, TNT-in nungchang ropui pho chhuakin 6-6 a nih hnuah an kalsan a. 14-10-a sang zawk an nih laiin Huntharin ho takin K Zodingliana service an la thei lo.

Mizo hlanga champion hmasa ber, TNT-in lawm em emin hnehna an lawm a, net bula lehlam vuak dangtu tangkai, Zosangzuala’n tum riat hlap tlain point hnih a hloh a, nikum ang bawkin KT Enterprise Best Blocker-a thlan a ni.

Lalhmangaihsanga Sailo chuan final a luhpui vawi hnihnaah hlawhtlinna chanpuiin coach tha ber chawimawina a dawng a, vawi sarih an khelhah chak fai vekin phu takin trophy an la.

A hnung atanga inkhel tinungtu, TNT libero Lalramnghakdika kutah KT Enterprise Best Receiver lawmman hlan a ni a, champion team-in mi mal chawimawina an lak loh awm chhun Best Setter-ah Hunthar captain Remsangzuala an thlang.

Kum nga hnua final an khelh vawi khatnaah Huntharin champion hnem ber an nih tawhna tipunga vawi thum champion hmasa ber ni thei turin boruak tha an hip hman a, set lina atanga an hnungtawlh hnuah uiawm takin an puitlin zo ta lo.

Stats:
FINAL:
TNT:
Vanlaltanchhana: point hmuh - 34, point hloh - 9
Laldinchhunga: point hmuh - 17, point hloh - 5
Zosangzuala: point hmuh - 8, point hloh - 2
Vanlalchhantluanga Sailo: point hmuh - 6, point hloh - 6
Sadrak Fanai: point hmuh - 8, point hloh - 3
K Zodingliana: point hmuh - 5, point hloh - 2
Lalliankima (setter): point hmuh - 5, point hloh - 2

HUNTHAR:
Gagandeep Singh: point hmuh - 27, point hloh - 15
Zomuansanga: point hmuh - 20, point hloh - 11
Lalramnunfela: point hmuh - 9, point hloh - 3
Lalruatfela: point hmuh - 9, point hloh - 4
Laldensanga: point hmuh - 2, point hloh - 1
Lalnunfela: point hmuh - 2, point hloh - 2
Remsangzuala (setter): point hmuh - 5, point hloh - 3

CHAMPIONSHIP:
TNT:
Vanlaltanchhana: play 7 (point hmuh - 176, point hloh - 53)
Laldinchhunga: play 6 (point hmuh - 77, point hloh - 35)
Zosangzuala: play 6 (point hmuh - 60, point hloh - 18)
Sadrak Fanai: play 7 (point hmuh - 56, point hloh - 23)
Vanlalchhantluanga Sailo: play 7 (point hmuh - 35, point hloh - 25)

HUNTHAR:
Gagandeep Singh: play 7 (point hmuh - 158, point hloh - 75)
Zomuansanga: play 7 (point hmuh - 90, point hloh - 54)
Laldensanga: play 7 (point hmuh - 58, point hloh - 22)
Lalnunfela: play 7 (point hmuh - 54, point hloh - 24)
Lalramnunfela: play 7 (point hmuh - 51, point hloh - 23)

LAWMMAN:
Champion: Thutak Nunpuitu Team
Pahnihna: Hunthar

KT Enterprise Best Spiker: Vanlaltanchhana (TNT)

KT Enterprise Best Blocker: Zosangzuala (TNT)

KT Enterprise Best Setter: Remsangzuala (Hunthar)

KT Enterprise Best Receiver: Lalrammghakdika (TNT)

KT Enterprise Mizo Best Player: Vanlaltanchhana (TNT)

KT Enterprise Best Coach: Lalhmangaihsanga Sailo (TNT)

PRO VOLLEYBALL LEAGUE MIPA CHAMPION:
2016 - Anastasia Electric Veng
2017 - Hunthar
2018 - Hunthar
2019 - Chhinga Veng Spikers
2022 - Durtlang North
2023 - Thutak Nunpuitu Team