Thutak Nunpuitu Team-in awlsam takin Nilaini zan Tata SK 712 Pro Volleyball League-ah 3-0-in Tuipuiral an hneh a, khelh thum chak zawnin semifinal an hnaih ta hle a, an spiker Vanlaltanchhana (Valbuanga) a khel a hmuhnawm zel.

R Dengthuama Indoor Stadium, Mualpuiah 25-16, 25-10, 25-14-in TNT an chak a, inbuatsaihna ang mai khel chungin player enchhin nan hmang tel.

An tira paruk lut thin zingah Zosangzuala leh Laldinchhunga an awl a. Chuti chungin Valbuanga’n point 16 hmuin tum thum a tisual a, set thumna tawp lamah hahchawlhtir ni ve leh mah se a zawnin vawi thum D3 Business Player of the Match lawmman a dawng.

Chhinga Veng Spikers an hneh loh tum ang bawkin Tuipuiral tan Anurag Rawat a mal tan leh a, vawi 22 vaw tla mah se point 14 a hloh. Set thumna tirah Delhi tlangval hian 5-5 a nih theih nan point a thawk chhiak na a, a tanpuiten awmze neia an thlawp theih loh avangin lehlamin set hmasa pahnih ang bawkin inthlau takin hma an hruaisan zui.

TNT-in hmun chang tam lo an player-te tan hun tha an siamsak a; K Zodingliana’n point khat chiah hlohin tum kua a hlap tla a. Lalhriatpuia, Ramdinpuia leh Lalremruatsanga ten nuam ti takin an khel bawk.

Kai thar, Tuipuiralin phurna nei tur khawpin an bei let zo lo va, Anurag tih loha thawh hlawk ber, Laltlanchhuaha’n point hnih hmuin vawi hnih tho a hloh a, Lalrammawia Fanai chuan point khat hlawhin vawi kua a tisual.

Khelh hnih an la neihah point khat an neih belh chuan TNT an tlang thei tawh a, Zirtawpni zanah vawi hnih chak zawn mek, Chhinga Veng Spikers nen an inhmachhawn ang.

An khelh dan atangin Tuipuiral an zuamawm a, an boruak hapin team dang a el pha rih lo. Pro Volleyball-a an tel vawi khatnaah tum khat tal chak tur pawhin an tan chona a sang a, vawi hnih an tlawm zawn hnuah rin hlawh, Hunthar nen Inrinni zanah an intawn a ngai dawn leh nghal.

Stats:
TNT:
Vanlaltanchhana: point hmuh - 16, point hloh - 3
Vanlalchhantluanga Sailo: point hmuh - 2, point hloh - 0
Lalhriatpuia: point hmuh - 5, point hloh - 2
Sadrak Fanai: point hmuh - 7, point hloh - 1
K Zodingliana: point hmuh - 9, point hloh - 1
Ramdinpuia: point hmuh - 3, point hloh - 0
Lalremruatsanga: point hmuh - 2, point hloh - 0

TUIPUIRAL:
Anurag Rawat: point hmuh - 22, point hloh - 13
Laltlanchhuaha: point hmuh - 2, point hloh - 2
PC Vanlalnunmawia: point hmuh - 3, point hloh - 5
Lalrammawia Fanai: point hmuh - 1, point hloh - 9

POINT TABLE:
1. TNT: Play 3, Won 3, Loss 0 - Point 9
2. Hunthar: Play 2, Won 2, Loss 0 - Point 6
3. Chhinga Veng Spikers: Play 2, Won 2, Loss 0 - Point 6
4. Tuichangral: Play 2, Won 0, Loss 2 - Point 0
5. Durtlang North: Play 3, Won 0, Loss 3 - Point 0
6. Tuipuiral: Play 2, Won 0, Loss 2 - Point 0

FIXTURE:
JUNE 15 (NINGANI):
08:00 pm: Tuichangral v Durtlang North (mipa)

JUNE 16 (ZIRTAWPNI):
03:30 pm: Kanan v Power Department Sporting Club (hmeichhia)
08:00 pm: TNT v Chhinga Veng Spikers (mipa)