June 29, Inrinni zana zawh tak, St. Mary’s Branch Catholic Ṭhalai Pawl ten Golden Jubilee puala a buatsaih Proclaim mal zai intihsiakah Dilkhan tlangval Francis Lalṭhatpuia chu pakhatna a ni. Ani hi Don Bosco Parish, Seling Bial aiawha tel a ni. Lawmman pahnihna chu Flora Saizikpuii, Electric Veng, St. Mary’s Parish Bial a ni a, Regina Laltlansangi, Ramthar, St. Lawrence Parish aiawh chu pathumna a ni.

Final Round-ah hian hla 2 hmangin finalist 5 te hian intihsiakna hi an hmachhawn a, Catholic Rawngbawlna Hla Bu a mi leh hla dang finalist ten an mahni thlan an sa. Francis Lalṭhatpuia hian Rawngbawlna Hla Bu a mi, ‘Hringnun kan zin kawngah hian’ tih leh Pu C. Lalzarmawia hla phuah ‘An Hrilhfiah’ tih chu thiam takin a rawn sa a ni. Judge te pawn an fak tlang hle, a zai a nungin mipui lawm a hlawh hle. 

Lawmman pahnihna dawngtu Flora Saizikpuii hian Rawngbawlna Hla Bu aṭangin ‘Lalpa thlipui a tleh chiam a’ tih leh ‘I Ropui Zia’ tih hla a rawn sa thung. Regina Laltlansangi hian Rawngbawlna Hla Bu a mi ‘Tlang mawi tak chu a awm’ tih leh ‘Beiseina’ a rawn sa a ni. Finalist dang 2 Rufina Remsangpuii leh Damian Lalṭhatluanga te pawn thiam takin an rawn zai bawk a ni.

Proclaim Judge te pathum Chali, Israel Lalbiakrema leh Amanga Francis Sailo te pawhin Fak hla hmangin kal khawm te thiam takin an awi a, Chali hian a band Evenflow te nen ‘Krista Chhanchhuah te’ tih hla an rawn sa a. Israel Lalbiakrema hian ‘Siamtu Kutchhuak’ tih a rawn sa thung. Amanga hian a band Project Praise te nen ama hla phuah an rawn din chhuah pui bawk a ni.

Proclaim Winner hian Trophy, sumfai bakah Sponsor te aṭangin thilpek hrang hrang a dawng bawk. Final show hi Zonet Empai-ah thlir let theihin a awm dawn a, an zai lai hi Zonet Youtube Channel lamah dah chhuah a ni bawk ang.