Aizawl: Tun hnaia vawk natna chi khat ‘Porcine Reproductive & Respiratory Syndrome (PRRS)’ leng vangin Mizoramah vawk 3099 an thi tawh. Zalen palaiin AH&Vety Department thawktute hnen atanga thu a dawn danin PRRS hrileng hi a ziaawm tan tawh a; mahse, tun kar chhung khan he natna vei thar 99 chhinchhiah a niin hemi hun chhung vek hian vawk thi 20 an awm a, vawk thi te hi Serchhip district-ah 15 leh Aizawl district-ah 5 te an ni. AH&Vety department thawktute chuan PRRS hi Mizoram district zawng zawngah hmuh a ni tih sawiin tunah hian Lunglei leh Serchhip district-ah te a la hluar deuh a, district dangah chuan a ziaawm tawh niin an sawi. PRRS chu mihring atanga kaidarh theih a nih avangin fimkhur a ngai nia sawiin Vety department thawktute chuan ran thi sawngbawl kawngah fimkhur taka thiltih nise an duh tih Zalen an hrilh a. PRRS vanga vawk thite chu zuar lo turin mipuite an ngen tih sawiin zuar an awm a nih chuan dan anga hrem an ni dawn tih an sawi bawk.10