Aizawl: Tunlaia Mizorama leng mek, Vawk natna chi khat, PRRS vangin vawk 3583 a thi tawh niin AH&Vety Department chuan an chhinchhiah. Zalen palaiin AH&Vety Secretary K.Lalnghinglova hnen atanga thu a dawn danin vawk natna Porcine Respiratory and Reproductive Syndrome leng mek chu hmun hrang hrangah a la darh tih a sawi a. AH&Vety department chuan theihtawpa hma lain damdawi bakah mipui zirtirna ‘awareness campaign’ nasa takin a kalpui mek a ni tiin Vawk natna chu mihringten fimkhur tawk loh vangin an pu darh nasa niin a sawi a. Kum 2013 vel atangin PRRS chuan Mizoram a la chamchilh reng niin a sawi bawk. AH&Vety Secretary chuan vanduaina avanga vawk thite tan Agriculture Ministry-ah zangnadawmna an dil mek nia sawiin an hlawhtlin dawn leh dawn loh a la hriat loh a. Central lamin insurance-ah Bawng leh Lawi chin an tih avangin sum pawh hi hmu se tam anih a rinloh thu Zalen a hrilh bawk.