Mauricio Pochettino-a'n Paris St-Germain manager hna a chawlsan hnu lawkah an ram mi Christophe Galtier chu coach turin an lalut nghal. Galtier leh PSG chuan kum hnih chhung a tan inremna ziakin 2024 nipui thleng a cham ang. 

Thla hmasa khan Galtiera chuan a enkawl lai Nice a chhuahsan a, Nice hi season nga chhung chu Ligue 1 khelhpui tawhin season liam ta khan French Cup-ah pahnihna a nihpui bawk. 

Kum 55 a upa Galtier hian kum 2021 khan Lille chu Ligue 1 title a chawipui a, Galtier hi Qatari mi hausain kum 2011-a PSG a lei hnua an coach pasarihna a ni. "Paris Saint-Germain ka zawm thei hi ka hlim a, chairman Nasser Al-Khelaifi-a chunga lawmthu ka sawi duh a, football advisor Luis Campos leh keimaha rinna nghattu club chungah ka lawm em em a ni," tiin Galtier chuan a sawi. 

Kum 10 chhung khan Ligue 1 manager zingah PSG ni lo champion pui thei manager pahnih chiah an awm a, chumia pakhat zawk chu Galtier hi a ni a, pakhat zawk chu 2016-17 a Monaco champion puitu Leonardo Jardim a ni.

Tun hma lam chuan Galtier hian Saint-Etienne a enkawl thin a, Lille enkawl lehin thla sawmpahnih chiah a enkawl tihin beisei loh takin May 2021 khan Ligue 1 lamah Lille a champion pui a, reilote hnuah a chhuahsan leh hlauh thung. 

Kum 50 mi Pochettino hian PSG hi thla 18 chiah a enkawl hman ve thung a, season liam ta khan French title lak tam lama record awm mek nih rualpuiin Ligue 1-ah PSG a champion pui a, PSG a enkawl hnuaa a champion-na hmasa ber a ni bawk. Tottenham boss hlui-i'n club a chhuahsan tur thu hi chu thla khat dawn a thang vel tawh a, mahse, vawiin lama Galtier a manager tura an ruat fel hnuah chauh a chawlh tur hi an puang chiang a ni. 

Club thuchhuaha an tarlan danin,"Mauricio Pochettino chuan Paris Saint-Germain a enkawl tawh dawn lo va, Mauricio Pochettino leh a staff te chungah kan lawm em em a, an hma hun turah duhsakna kan hlan bawk e. 

Manager a nih chhunga Mauricio Pochettino record (Competition zawng zawngah)
Team            Game Hneh  Draw Lost win %
Espanyol         161     53    38    70    33%
Southampton  60       23    18    19    38%
Tottenham      293     159    62    72    54%
PSG                 84       55    15    14    65%
Total               598    290    133    175    48%