Barcelona leh Manchester City ten lak luh ngei tuma an inchuh mek Vasco da Gama midfielder Andrey Santos lakah Paris Saint-Germain chuan an mit an len ve tan.

Santos hian Vasco da Gama-ah tun season bak contract a nei tawh lo a, an innghahna player pawimawh a ni chungin Serie A club Brasileiro lamah a let mai thei bawk. Kum 18 mi hian a club khelh mekna tan match 24 khel tawhin goal nga a khung tawh. Brazil U16 tan tum nga a khel tawh bawk. 

AS sawi danin PSG, Barcelona, Manchester City leh Flamengo te chuan Santos hi an awt hle a, tun nipui chhung ngei hian chan an tum hlawm a ni. Santos hian a club ngai Vasco da Gama-ah contract thar ziah a tum deuh nia sawi awm mah se Europe lama a kal mai a duh zawk ring an tam hle thung. Website Transfermarket chhut dan chuan Santos-a hlutna hi €5 million vel chauh a la ni.

PSG hian Porto midfielder Vitinha leh Lille player Renato Sanches te chu lak tumin an kherh mek a, an coach Christophe Galtier chuan Sporting CP defender Nuno Mendes leh RB Leipzig atangin Nordi Mukiele te lak tumin a thlithlai mek bawk. 

Chutih laiin Barcelona lam hian nakum lama chhuak mai tawh tura ngaih an captain Sergio Busquets aiawh tur an mamawh hle dawn a ni. Xavi Hernandez-a pawl te hian free transfer-in AC Milan midfielder Franck Kessie leh Racing Santander atangin Pablo Torre te an lalut tawh a ni.

Manchester City pawhin an defensive midfield thuam that nan Leeds United atangin Kalvin Phillips an la tawh a, striker thawm na Erling Haaland chu Borussia Dortmund atangin an la lut tawh bawk. Anderlecht atangin left-back Sergio Gomez leh  goalkeeper Stefan Ortega chu free transfer-in Arminia Bielefeld atangin a lalut tawh bawk a ni.