Messi leh Ramos te hi, ui leh kel thlun pawlh ang maia club inhal Barcelona leh Real Madrid lama kum 16 chhung zet in hmelma tawh kha an ni a, inngeih taka season an hman hnuah a vawi khat nan PSG lamah boruak an nei.    

Season liam ta khan PSG lamah mak tak maiin inkhel thiam pahnih te hi PSG-in an lalut a, team inhal taka awm thin kha team khatah an awm dun ta thut kha a ni. Chutia team-mate an nih takah chuan mi tam tak zawhna lo nita chu, team khat tan lungrual takin an thawk dun thei a ngem? tih hi a ni.

PSG hi season liam ta Ligue 1-ah khan an champion a, Messi leh Ramos te pawh champion team-ah hian an tel ve a, tun pre-season-ah pawh tha takin an khel dun a, an match khelhah an chak vek bawk. 

Hmanlai thil te chu theihnghilh niin khawng tam takah thawh hona tha an nei tawh a, thil thenkhat erawh theihnghilh theih loh a awm te pawh a ni maithei e. Training an neihnaah, tul lem lo takin Ramos chuan Ballon d'Or tum 7 dawng tawh Messi chu a tackle tlu tawp a, he an training lai hi fans lamin video-in an lo la si a, a tlangthang ta chiam a ni. 

Messi-a'n pet goal tura ball a khalh lai Ramos-a'n a lo tihtluk zawh hian rum takin an in melh nghe nghe a, World Cup winner Ramos hian boruak tha siam tumin a kutin Messi lu a va chul zui tak naa, an kar boruak siam that nan chuan a tawk zovin a rinawm loh. Hun reilote chhung chu Camp Nou emaw Santiago Bernabeu lama chengah an inngai thut te pawh a ni mahna! 

He video darh ta hi fans lam pawhin an react nasa nghal hle a, fans pakhat chuan, "Messi leh Ramos te pahnih indinchilh lai khan an club hluia an hmanlai rilru kha a rawn chhuak lehin ka hria," a ti. 

Thla tir khan PSG boss Mauricio Pochettino chu Galtier-a'n a thlak a, nasa takin club thlak danglam hna a thawk nghal a, cheng tluklehdingawn chuang seng tawh club hian Ligue 1 champion nih mai duhtawk lovin Champions League chawi ngei an duh a ni.