Nikum lamah Lionel-a’n Messi Paris Saint-Germain (PSG) a zawm hnu khan a hak thin jersey No.10 chu a ha chang lo va, Coupe de France Round of 16-ah khan a ha ve zawk a, mahse Ligue 1 lamah erawh No.30 a ha leh thung. Number 10 ha anga chhiar a nih loh vang hian he list-ah pawh hian a lang ve ta lo a ni. 

PSG tana khel tawh thin jersey Number 10 ha thin player ropui ber ber te chu:

#5 Jay-Jay Okocha

Kum 1998 khan Fenerbahce lama a khelh laiin Jay-Jay Okocha chu Paris Saint-Germain hian nipui transfer-ah Parc des Princes lama tual chai ve tawh turin an lei chhuak a. He Nigerian footballer hi a goal thun theih vang leh  kar tin assist a neih vang a hming thang em em chu a ni hauh lo.  Mahse, mual chhunga a chevel hi sawi nep thei erawh a ni lo thung.

Attacking midfielder, Okocha hian ball a thiamin a ball a pass dik thei hle a, striker ni si lovin jersey no. 10 a ha a, a mualphopui hran lo. An tum pui defender te buaina siam thiamna a nei. 

PSG tan Okocha hian game 113 khelin goal 20 a khung a, French capital club a zawm kum bak hian trophy pawh a chawi lo. 1998-99 season khan French Super Cup-ah an champion a ni.

#4 Safet Susic

1980’s chho vel kha chuan Paris Saint-Germain hi tun ang em hian an la lar lo va. An hming tilar turin an theih tawp an chhuah ve thin a, mi ten an hriat larna turin player tha leh thiam bik an mamawhna a sang hle a ni.

Kum 1982 nipui transfer-ah PSG chuan beiseina sang tak nen La Liga club Sporting Gijon atangin Safet Susic chu an lalut a, a passing tha lutuk vang leh a mit chak tak te, a ball thiamna vang te chuan Paris-ah pawh a mikhual rei lo. Hun reilo te chhungin a lar thuai a, an hmelma te tana hmachhawn chakawm loh tak player a rawn nithuai.

PSG midfield zinga an innghahna rawn nichho nghalin Susic chu a duhna hmun hmuna tlan kual thei turin zalenna pek a ni a, an chhuah zalen sual hran lo. Jersey no.10 ha-in a ball shoot leh a passing a hlauhawm thei fua fua hle. 

France-ah hian kum 9 chhung zet khelin PSG tan tum  343 a inlan hman a, goal 96 thunin assist 61 a nei a ni.

Susic hian a team PSG chu 1985-’86 season khan Ligue 1 title a lak pui a, ‘82-83-a French Cup an chawi pawh khan player thawh hlawk ber pakhat a ni bawk. Kum 2010 khan he Bosnian international hi Paris Saint-Germain player chanchina player tha berah France Footbal chuan a thlang nghe nghe.

#3 Rai

Sao Paulo atangin PSG chuan kum 1993 khan Rai hi € mtd 5 zetin an lei chhuak a, a hunlai chuan a man hi to viau mahse a lei chhuak tute hian an tisual hran lo. PSG club chanchin-ah chuan player tha ber zinga chhiar hmaih thiang tawh lo Brazilian hi a hun lai chuan khawvel-a attacking-midfielder tha ber pawl a ni. 

PSG a zawm atanga kum khat hnu 1994-95 season khan jersey no. 10 a ha tan a, hemi kum hian a che tha lutuk lo nain a hnuah an coach Luis Fernandez chuan a thatna a hmu chhuak chho ta zel a ni. 

PSG tana hun hlu leh  chhin chhiah tlak tak ni turin Bayern Munich lakah chakna a chan pui a, Champions Leaguea semifinal-ah Barcelona a hneh pui leh bawk. PSG-ah hian season nga chhung chu ropui takin a khel a, a hun tawp lamah an ram club leh a khelhna hlui Sao Paulo-ah bawk a kir leh a ni. 

An jersey rawng sen leh pawl-a tial chu kum 1994-95 leh 1997-98 khan domestic cup-ah tum hnih ngawt a champion pui a, Ligue 1 title leh Europa pokal tum khat ve ve a lak pui bawk.

#2 Neymar Junior

Khawvel player piang tawh zinga man to ber Neymar hi PSG tuna jersey no.10 ha mektu a ni a, Neymar-a hi PGS club-a khel tawh player zingah chuan a thiam leh tha ber zinga mi a ni. 

Barcelona atangin kum 2017 khan euro mtd 222 zetin PSG hian an lei chhuak a, tun thleng hian footballer zingah Brazilian captain aia man to an la awm rih lo. 

Tun thleng hian Paris Saint-Germain-in an duh leh awh ber Champions League title chu Neymar hian a la chawipui thei rih lo va,  mahse competition hrang hrang-ah a thiam zia erawh a lan tir fo tawh thin. 2019-20 season khan PSG hian Champions League final an lut a, hemi tum pawh hian kum 29 mi Neymar hi Parisian player zinga chetha ber niin final-ah Bayern Munich an hneh zo ta lo hlauh.

A dribbling skill ropui lutuk hi football ngaina tute tan chuan hmuhnawm a tling a, field vei lam kil a ball an chawk kual tak tak hi chu fans tan lo pawh hmuhnawm a tling.  A inhliam zin avangin game tam a chan phah tawh a ni. 

PSG tan Neymar hian game 130 khel tawhin goal 90 a thun tawh a, assist 55 a nei tawh bawk. Season li chhung lekin PSG hi Ligue 1 title pathum, French Cup pathum leh French League Cup pahnih a chawi pui tawh.

#1 Zlatan Ibrahimovic

Italy leh Spain lamah hlawhtling taka a khelh hnuah Zlatan Ibrahimovic hian 2012 nipui lai khan Ligue 1 palian Paris Saint-Germain hi AC Milan atangin a zawm a, hetih hunlai hian khawvel striker tha ber pakhat niin PSG a zawm tirh phat atangin Sweden international hian France ramah a ropuina a lan tir chhunzawm nghal.

Jersey no. 10 chu Ibrahimovic hian a rawn lar pui nghal a, a ho hian Ligue 1 lamah ro an rel a, a palian bakah a chak em avangin leh lam pawl defender tana player tawrhhlelhawm ber pakhat a ni. Ibrahimovic hian football a thiam piah lamah a thin chhiat leh a sual thiamna chu a lar pui hle bawk.

Kum 2012 leh 2016 inkar khan Sweden striker hian game 180 PSG tan a khel a, tum 156  zet goal thunin thian te goal thun tur tum 61 a siam sak thei bawk. A goal thun zo zai te chuan a club chu a zawnin Ligue 1 title pali ngawt a hlawh chhuah pui a, hei bakah hian French Cup tum hnih leh French League Cup tum thum a chawi pui bawk a ni.