Lionel Messi chu club-in a hrem hnua a khelh leh hmasak berah Paris St-Germain tantute chuan nasa takin an au el a, French giants chakna erawh a dal lem lo va, si nga faiin Ajaccio an hneh.

Messi-a hi kar hmasaa club phalna nei lova Saudi Arabia-a a zin avanga hrem a nih hnuah PSG-a a hma hun hi a chiang lo zel.

Fabian Ruiz, Achraf Hakimi, Kylian Mbappe-a goal hnih leh Mohamed Youssouf-a ten goal khat theuh thunin vawi thum khelh an la neihah PSG hian point 81 nei tawhin point li an hmuh leh chuan an champion ang. 

Parc des Princes-a inkhelah hian Messi-a hi coach Christopher  Galtier chuan bul tantu zingah a telh a, tan dawna au rinna hmanga a hming an puan chuan Argentinian hi nasa takin an au el a, first half bikah hian ball a tawh apiangin an ‘boo’ hluah hluah zel bawk.  

He inkhelah hian Hakimi leh Ajaccio-a khel, Thomas Mangani te chu hun tawp dawna hnawh chhuah an nih avangin mi 10 ve ve chauhvin an khel tluan. 

Tar lan tawh angin Messi-a hi April 30-a Loreint laka 3-1 an tlawm tukah Saudi Arabia-ah sumdawnna thilah a zin a, French chanchinbute chuan chawlhkar hnih hrem a ni tih an tar lang zui a. Mahse, Thawhtanni atang khan a training chhunzawm tan a, hrem hun chhung pawh tihtawisak zui a ni.

Messi-a hian hremna pek a nih hnu lawk, kar hmasa Zirtawpni khan ngaihdam a dil a; mahse, Pathiannia Troyes an hmachhawnah erawh khelhtir a ni chuang lo.

Galtier-a kaihhruai Paris club hian RC Lens lakah point rukin hma an hruai mek a, annihian Zirtawpni zan khan Stade de Reims-ah a tawpa player 10 chauh ni chungin Reims an hneh a. Lens hian pathumna, Pathianni zana a mawngphaha awm, Angers laka chak, Olympique de Marseille lakah point ngain hma an la hruai bawk.