Paris Saint-Germain chu Kylian Mbappe-a’n contract thar ziah a tum tawh lo tih thawm awm mek chungchangah an forward nen an thu a inhmu lo mek a, thuin an inbei a, dawt sawi an awm em ni ang?

Thawhtanni zanah Paris club hian an tana goal thun tam ber, Mbappe-a hian kum khat chauh contract a neih tawh a pawt sei duh lo niin an tar lang a. Heti a nih avang hian nakum nipuia man awm lova chhuahtir ai chuan tun nipuia man neia chhuahtir an tum niin thu a thang nghal.

Contract thar an zawrhte pawm lo nia club-in an chhuah hnu lawkah hian Mbappe-a’n thu thar a rawn nei a, thla 12 dawn liam ta chhungin engmah sawiho a awm lo niin a sawi a, a club thu chu a dik tih a sawi ve thung.

PSG chuan an forward hi an chhang let nghal a, kum 24 mi hi ‘dawi sawiah’ hial an puh ta.

“Mbappe-a te lamin contract ziah belh tuma indawrna a awm lo tih an sawi hi dawt a ni,” tiin club thupuangtuin New York Times hnenah a sawi a, tu thu zawk nge dik hriat a har ta hle.

French forward hian Thawhlehni chhun khan a contract neih lai chu hman zawha season lo awm leh tur hi Parc des Princes-a a la awm a duh tih Twitter-ah a tar lang leh a, Real Madrid-a a kal theihna tura thu vai vir anga sawi awm chu a pha.

Real Madrid hian Mbappe-a’n ram tana a khelhpui thin, Karim Benzema an chhuah tak avangin a aiawh turin an duh tih a chiang a, nikum lamah pawh an lo um hrep tawh a. Tuna remchang a awm takah hian sawi rik lehnghal an ni a; mahse, thenkhat chuan nakuma man awm lova lak an tum zawk niin an sawi a. Tun nipuiah chuan Tottenham striker Harry Kane zawk an thlithlai niin an sawi.

PSG hian Mbappe kawppui, Lionel Messi chu Inter Miami-a kal turin an chhuah tawh a, Neymar lah Saudi Arabia lama kal tura sawi rik a ni bawk.

Christophe Galtier chuan Ligue 1-ah champion-pui mah se manager atangin an chawlhtir bawk a, an insiksawi nasat a ngaih hmel hle.