• Lalremsanga, Mission Veng
• Chief minister ni a ram a kaihhruaina hi dahtha ta ila, Pu Hawla hi, tunge maw a nih chiah ang le? 'Serampore' hian 'khawtlang leh kohhrana' a 'thawh hlawk hriatpui nan' tiin 'Doctorate Degree' kan pe dawn e, an ti a. A phu chiah em aw! A petu turin phu ti mah se, mipuiin phu kan tihpui loh chuan a hlu tak tak dawn si lo.
  Eng pawh ni se, Pu Hawla hian a phu ve tak tak em tih hre tur chuan Pathian thu lam leh khawtlang, ram leh hnam thila a thawh kan hriat a ngai a. Kan hriat hnua, phu lo, kan tih chuan kan thu a ni a. Hriat nei si lo a, phu lo, kan tih erawh chuan puitlinna a ni lo ang. Chuvangin, hriatna tipung duh leh ngaihtuahna fim hmang thin mi puitling tan ka ziak a ni e.
  Awle, ‘Serampore’-in Pu Hawla ‘Doctorate Degree’ an pek chhan tur inziakah chuan ‘Master and the Council of Serampore College chuan, kohhran leh khawtlang tan i thawk tha tih hriatpui nan Degree of Doctor of Divinity (honoris causa) hlan che lungrual takin kan rel’ tih a ni a. Heta ‘kohhran’ hian Pathian thu lam a kawk a, ‘khawtlang’ hian ram leh hnam thil a kawk tih kan hre vek awm e.

Pathian Hminga Thil Tihnaah: Pu Hawla hi kan evangelist te anga Pathian thu ropui tak tak sawi a ni lem lo a. Kan reverend zahawm tak tak te anga hun puma kohhran leh Pathian thu buaipui a ni lem lo. Politician a nih miau avangin Mizotena kan ngaihsan zawng tak Pathian thu sawiin hun a hmang tam ve thei lo tih chu kan hriatthiampui vek awm e.
Amaherawhchu, ram hruaitu nih pawh hian, fel famkim lo mah ila, Pathian duh zawng hi a lo tih ve theih tho mai a. Chu chu kan ringtupui te'n an lo hriatin Pathian hminga thil tihna reng rengah min lo hmang tangkai ve duh thin a lo ni.
India ram hmun hrang hrangah Pu Hawla hi ringtuten an lo hmang tangkai ve thinin a lang a. Sawm a hlawhna pawh Pathian hminga thil tihnaah a ni. Kum 2014 khan Varanasi Mission-in Pathian biakna hmunpui tur ‘Tawngtai Inpui’ an tih chu hawng turin an sawm a. Hemi tum hian Hindu-ho hmun thianghlim Ganges lui kam, Lal Isua hming an la lam rik lohna hmunah vai pastor leh kan Chief Minister chuan Pathian thu an lo zuk sawi ve hmiah hmiah mai a ni.
Sakhaw hruaitu emaw Pathian thu thiam ni lem lo mah se, Bible Society of India, kolkalta Auxiliary-in William Carey-a kum 254 piancham an lawmnaah William Carey-a chungchangah zirtirna pe turin an sawm a. Chu mai bakah, Bible Society sawmna angin St. Paul’s Cathedral, Kolkata-ah te, William Carey-a BiCentenary Celebration, Bangalore-ah te, Cuttack, Orrisa Auxiliary-ah te, Bicentenary Celebrations kharna, Guntur, Andhra Pradesh-ah te, New Delhi-a ‘Festival of Peace,’ Billy Graham Evangelical Association leh Bible Society of India te'n an buatsaihah te rawngbawlna a lo nei tawh ve tawh a.
Baptist Church, Raikia, Kandhamal, Odisha-ah an kum 75-na, Platinum Jubilee-ah te, Seventh Day Adventist Church-in Bangalore-a World Conference an neiah te rawngbawlna a lo nei ve tawh bawk a ni.
National Council of Churches in India, kum 1914 a din kum 2014-a centenary an lawmin thu a sawi bawk a. Hetah hian Organising Committee member a nih bakah Souvenir Sub-Committee member niin an tangkaipui ve viau a ni.
Heng bakah hian Mizoram pawna kan Mizopui leh Vai Kristianten Pathian hminga thil an tihnaa chanvo a neihna thahnem tak a la awm a. Kohhran intelkhawmina an sawmnaa Pathian thu a sawi pawh eng emaw zat a la awm. Chu mai bakah Kaladan Multi-Modal Transit Transport Project leh Burma leh Bangladesh border trade pawh hi chanchin tha hrilna remchang a nih tur thu a tlangaupui thin tih kan hria a. Zo hnahthlak luah ram te a tlawhin, khawvelah Mizoram chu sakhaw lian ber ber pahtum Buddhist, Mosolman leh Hindu ten hual mah se, chanchin thain min zawng chhuak a, keini pawhin chanchin tha chu an hnena hril tur kan nih thu a sawi uar hle tih pawh kan hria a ni.

Khawtlang, Ram leh Hnam Thilah: Zarkawt YMA branch dintu a ni a, YMA Life Member a ni. Hei bakah hian khawtlang, ram leh hnam thilah hian hnuhma nei ve nualin, pawl lian ber berah te hian a dintu president a ni a. Mizoram Sports Association dintu president a ni a. Mizoram Hockey Association dintu president a ni bawk a. Mizoram hockey team captain pawh a lo ni tawh a. Assam team-ah pawh vawi hnih a tel ve tawh a ni.
Mizoram Football Association (MFA) dintu president a ni a. Hockey ang bawkin Assam football team-ah a tel ve tawh a. Football tan phei chuan chief minister a nih anga hmasawnna lian tham thleng chu, entirnan, football khelh nan hmun kuaah phûl phah a ni tawh a. A dang tam tak Congress mite tana chhiar nuam tur la awm mah se, fair taka khawtlang, ram leh hnam tan a thawh hlawk leh hlawk loh kan sawi dawn avangin MFA lam chu kan duhtawk ang.
Mizoram Olympic Association dintu president a ni a. Singapore-a International Conference on Sports and Culture Relations-ah Indian Olympic Association aiawhin a lo kal ve tawh bawk a. Kum 2004 Olympic, Athens-a hmanah te khan Indian Olympic Association aiawhin a kal tawh bawk a.
Indian Wushu Delegation Team hi Rome khawpuia International Wushu Competition-ah a lo hruai tawh a, hetah hian Gold pali leh Silver panga an rawn hawn a.
Cricket Association of Mizoram (CAM)-ah hian President a ni tawh bawk a. Amah vang hian Board of Control for Cricket in India (BCCI)-ah associate member an ni, a tih ngam a. Cricket khelhna hmanruate hi vaibelchhe hnih man an dawng tawh a. Tuna Ranji Trophy-ah te khan kan Mizoram cricket team-ten an khelh ve theih phah a. Tunah phei chuan a zarah BCCI-ah full member an ni ve tawh a. Hemi avang hian 2018-2019 season chhungin Cricket Association of Mizoram hian vaibelchhe 10 chuang a dawng tawh a. Senior team-a khel pha cricket player-te hian season khatah BCCI tournament khel kim ta se, player pakhatin nuai 25 a dawng phak a ni.
Tuna kan chanchinbu pawl lian leh zahawm tak, MJA dintu president a ni a. Tuna an Press Club building hi amah vanga an neih a ni a. Tun thlenga chanchinbu la awm, Mizo Aw dintu editor a ni bawk a. Mizoram Boxing Association leh Aizawl Dramatic & Cultural Society-ah hian a dintu secretary a lo ni tawh bawk.
Tin, Zo hnahthlak hrang hrangte’n kût hmanpui turin an sawm thin a. Chikim Kûtah te, Kûki unau te kût, Chavang Kûtah te; Zomi unauten Khuado Kûtah te, Burma rama Mizoten Chapchar Kût an hmanah te, United Naga Council of Manipur-in Luingaini Kût an hmanah te an sawm a. Hemi tum hian Naga emaw intite chu Zo hnaththlak an nih zawkzia a hrilh uar thei hle a ni.
Chu mai bakah chuan hel pawl pahnihin inremna thu sawipui tura an sawm angin a lo sawipui ve tawh a. Pakhat zawk chu Kuki Underground te an ni a. Inbiakna a han tanpui atang chuan pawl khatah an inchhung a. A hmingah Kuki National Organisation an ti a. Inkahhâi puan a ni a, tun thlengin inbiakna a la kal zel a ni. Pakhat leh chu, United People’s Front (UDF) an tih hel pawlte an ni a. Tripura National Volunteers/Tripura National Liberation Front hotupa Pu Bijoy Hrangkhawla’n Pu Hawla hnenah palaia tirin, “Mizorama remna in neih ang hi kan duh ve,” tiin inremna thu sawipui turin an sawm a. Inbiakna an neih hnu chuan remna a lo awm leh ta a. Kum 30 zet Sinlung Hills-a buaina a awm hnuah pawh April 2, 2018 khan a kaihhruaina leh Hmar mipui te hmalaknain remna leh muanna a thleng a, Sinlung Hill Council kan tih chu a lo piang ta bawk a ni.
Kum tam tak Mizorama buaina a thlen hunah pawh kum 1984 khan Mizoramah Pu Hawla kaihhruai sawrkar a lo piang a. Ram buai avanga khua te khawm a, Mizo leh Mizo tam tak inthat a, kan râltit em em laiin Chief Minister Pu Lal Thanhawla chuan, “Inremna atan chuan ka dinhmun thawhsan tur hian second khat pawh ka inngaihtuah lo vang,” a ti a. Ram buai avanga hmeichhiaten vai sipai laka harsatna an tawh na te; kham khawp ei tur nei lo a, chhungkua a, ramhnuaia riltama an awm thin na te, Mizo leh Mizo inthah tuma inveh te leh buai avanga ralthuamin mipui a tihthlabâr zawng zawngnate chu Pu Lal Thanhawlan chief minister a nihna a ken chiah khan a tawp ta vek a, remna leh muanna Mizoramah a lo thleng ta a ni.
Hei hi ‘kohhran leh khawtlang (ram leh hnam) tana a thawh ve tawh langsar zual a ni a. Hei hi an hriatin ‘Serampore’ chuan ‘Doctorate Degree’ pek an tum ni berin a lang.
‘Serampore’ hi university lianpui, a hnuaia college leh seminary inziak lut pawh 55 lai nei an ni a. Inkhawm ve thin tan chuan kan pastor-te kamchhuak atangin hriat loh rual a ni lo. A zahawm avangin kan dah sang hle a. Chumite chuan Pu Hawla chu ‘Doctorate Degree’ pek phu an ti hi chief minister a nih anga ram hmasawnna tura a kaihhruaina ngaihtuah tel loin, pek an tum chhan tak, ‘kohhran leh khawtlang tan’ a thawh hlâwk avangin, an ti hi rilru fim taka ngaihtuah chuan a âwm viauin a lang. Rev. Chuauthuama pawhin, “Mi awm mai mai leh eng mah tih nei lo an pe ngawt ngai lo!” a tih kha maw.