Aizawl ; Vawiin March ni 1, 2023 hian Mizo Hnam Runah Mizo National Day vawi 57-na hman a ni. He hun hmanpuitu MNF Sr. Vice President leh Dy.CM ni bawk Tawnluia chuan, Mi thenkhat ten kalsual leh India hmelma angin sawi mah se, Laldenga kha Freedom Fighter an ti a, Mizo Hnam Pa-ah an puang tih a sawi. 

MNF Sr.Vice President Tawnluia chuan Zoram mipui zawng zawng Mizo National Day chibai a buk tih sawiin, hemi rual hian Hnam tana martar zawng zawngte pawh zahna chibai a buk tih sawiin, "Kan ram hian Hnam Pa Pu Laldenga zahna chibai buk nachang kan hriat zel a ngai a ni. Pu Laldenga'n Mizo Hnam champion tura a kaihruaina kha a nep lova, hnam dang laka nekchep kan nihna tur a ta khaichhuakin, hnamdang hriat leh thlir kan ni. Mizo hnam tan zalenna a sual a, ram tan a bei ngam a ni. Mi thenkhat ten kalsual leh India hmelma angin sawi  mah se, keini chuan Pu Laldenga kha Freedom Fighter kan ti a, Mizo Hnam Pa-ah kan puang a ni," a ti. 

MNF Sr.Vice President chuan, "Hnam tana martarte kha kan hnam kalzelna tura nun hlan te an ni. Kan hnam martar-te rual zelin kan kal dawn. An neih zawng zawng, finna leh theihna bakah nunna thlenga an hlan ang hian keimahni pawh kan inhlan ve dawn lawm ni?" tiin ngenna a siam. 

Ramhnuaia an lut chu thil nuam a ni lo tih sawiin, an thil tawn turte kha hre lawk sela chuan an ngam lo mai thei tih sawiin, ‘Kan hnam movement, Pathian leh kan ram tan tiin theih ang tawk thawk turin kan rammu a. Mahni tana rammu kan ni lova, ram leh hnam tana thawk kan ni. Thisena hming ziak, Mizo Nationalism chawinung tur leh kan ram him nana chhuak kan ni. Vangvat leh thosi karah, thawmhnaw tet nen kan thawk a, mahni ropui nana ti kan ni lo. 'Mizo National Day' kan hman hian a pianchhan, a nihphung leh kalpui zel dan tur chu keimahni koah a innghat a ni," a ti. 

Tawnluia chuan Mizo National Day lo pianchhan sawiin. MNF hruaitu hmasa mi 61 te khan March ni 1, 1966 ah Mizo hnam zalenna turin independent an puang a. Khawvel hian chawhchhiat pawh tum sela a theih tawh loh. Mizo hnam pumin min thlawp a ni. A tihpuitlinna turin hnam dinchhuah nan, chaw ngheiin lu chhum ban chhum huamin an lo bei tawh a ni. Kan hnam dinchhuah zel nan an kal zelna kawnga chakna thar an lakna tur a ni. Khawvel hriatah Zoram zalenna an sual a, Political solution erawh Zoram mipuite duh danin India nen inremna neih a lo ni ta a ni, a ti.

Dy. CM chuan "MNF chu he hnam kaihruai tur hian Pathianin kan thiam leh thiam loh, kan fin leh fin loh lam chhut loin min dah a. MNF hi Mizo hnam tana din leh ding a nihna hi a ropuina a ni. Mizo hnam hmahruaitu leh hnarkaitu kan ni a. Pathian leh kan ram tan tiin zalenna neia rorelna pakhat hnuaia awm leh kristian kan nihna vawnhim te chu a dinchhan a ni. Kawng laklawhah min kalsan dawn lo a ni," a ti.

Zohnahthlak hrang hrangte rorelna pakhat hnuaia awm chu an duh ber, MNF nationalism laimu pakhat a la ni reng tih Tawna chuan sawiin, "Myanmar leh Bangladesh atangin kan unau raltlan an lo lut a. Raltlan tan India sawrkar a che thei lo. Kan pianpui unaute kan phatsan thei lo a kan thlahthlam dawn lo. Kan tihtheih tawk tlem mah se, theih tawp kan chhuah a, chaw nghei an awm kan phal lo a ni," a ti.

Dy. CM chuan Mizo Nationalism chu a la nung reng tih sawiin, tun tum Assembly session neih zawh takah pawh rulling leh opposition MLA ten Assemly House-ah Uniform Civil Court (UCC) duh lohna pawh lungrual takin  pass a ni tih a sawi. Hei hi kan thinlunga nationalism spirit a awm tlat tih tichiangtu a ni a,  Mizo hnam timawitu a ni’ a ti.