Aizawl March 4, 2023: MPCC Campaign Committee ruahmanna anga Rengdil, Zamuang, Sihṭhiang, Saikhawthlir leh Chuhvel tlawha zin mek MPCC Spokesperson Dr. Lallianchhunga chuan, "Pu Lalsawta hi leibatna Sal atanga Mizoram chhanchhuak tura Pathian min pek a ni", a ti.

MPCC Media Department Chairman ni bawk Dr. Lallianchhunga chuan, "Mizoram mipuiten harsatna kan tawh apiangin chumi sukiangtu atan Congress Party hi Pathianin a lo hmang tawh thin a. Kum 1984-ah Mizoram mipui mamawh ber chu Remna leh Muanna a ni a, chumi thlen tir tur chuan a vawikhatna atan sawrkarna kan chelh a. Kum 1989 leh 1993-ah rambuai avanga khawsak harsa, dinhmun tleu tawhten lei rem an rah theihna turin Congress Party bawk mipui rawngbawl turin a chawi sang leh a. MNF sawrkar hmasaah Mizoram sum leh pai dinhmun a chhe em em a, chumi siam tha tur chuan Congress Party kan sawrkar a, Mizoram leiba tam tak rulh nghal a ni. Tunah pawh MNF ten kum 4 chauh sorkarna an chelh chungin kan leiba chu vaibelchhe 6000 chuangin a pung leh ta a, Mizoram sum leh pai dinhmunin a Sen a kawk a, ICU-ah enkawl ngaiin kan awm leh ta.  He harsatna sukiang turin Finance enkawl thiam, enchhin chawp ngai lo hruaitu, Pu Lalsawta hi Mizoram hruai chhuak tura Pathianin min pek a ni," a ti.

Dr. Lallianchhunga chuan, Congress Party in hruaitu atan Pu Lalsawta an nei chu Congress Party tan chauh ni lo, Mizoram tana vanneihna a nih thu sawiin, "Minister term 2 a chelh chhungin hmingtha takin a term a hmang tluan a, sum leh pai enkawlna lama mi hmingtha chungchuang a ni," a ti. Lalsawta chu Party dangte pawhin an awh thu leh amah beih tumte pawhin beih ngaihna an hriat lo, a ti.

Mizoram leiba chu India ram State-ah GSDP atanga teh a leiba nei tam ber pawl kan nih avangin mithiamte lu a hai nia sawi, "MNF sawrkarin kan ram sum leh pai an enkawl danah an mangang tak zet a ni. Chu sum leh pai tam tak leibatna Sal atanga Mizoram chhanchhuak leh tur chuan Mizoramin Pu Lalsawta hi a mamawh a ni," a ti bawk.

MPCC Spokesperson Dr. Lallianchhunga chuan, Tang Puihna hmanga kuthnathawktute kut an tih chak tur thu sawiin, Congress Party chu miretheite tana ding thin, mipui hnena intiamna tihlawhtling thintu niin a sawi. "Congress sawrkar hnuaiah miretheite din chhuahna tur leh mirethei zawkten an chanvo an dawn theihna tura Sawrkar Tha siam hi Pu Lalsawta kaihhruai Congress Party thil tum a ni," a ti bawk.