Mizo ten Journalist kan neih that ber zinga pakhat Vanneihthanga Vanchhawng (Pu Vana) chuan Congress party a zawm a, hei hian a Instagram account lamah nghawng a nei nghal thung. Eng nge a chhan ni ta ang? 

Pu Vana hian tun hnai mai khan IG-ah hian follower nuai khat (100k) a nei tling a, amah pawhin lawmthu sawina a tarlang nghe nghe. Mahse tunah chuan 99.7k ah a tla thla leh a, follower 3000 vel a chan tihna a nih chu. Hei hi a chhan ber nia lang chu Congress party zawma politics a luhchilh vang a ni. 

Mizo mipuite hian political party a zawm hi an ui nge ni ang a, congress party kher a zawm hi an duh lo zawk? Mipuite hian huaisen taka sawrkar kalphung dik lo sawisel ngam investigative journalist tha kan la mamawh a, chu chu vawng nungin a hna hi thawk zel se an duh? Nge ni ang a, politics tuinuah lut ve lo hrim hrim turin an duh zawk? zawhna tam tak a awm thei awm e. 

Pu Vana hian politics luhchilh law law a, a chhung atanga ram siam thatu zinga tel a duh vangin a zuang lut a nih a rinawm. Chutiang tur erawh chuan a kawng zawh tur a la thui hle a, bul a tan ve dawn chauh a ni. Ram siamthat hna thawk tak tak tur chuan MLA inthlanah tlin phawt a mamawh dawn a, chumi tur chuan mipui thlawpna a hmu tha ang em tih chu hunin a la hril dawn a ni.  

Engpawh chu nise 'public darling' a ni a, a lakah mipui thikthu a chhia tih chu chiang takin a lang. Ram a vei zia leh sawrkar tha neih a pawimawh zia vawi eng emaw zat a lo au chhuahpui tawh a, a taka thawk tura hnathawh kawr a inbel ta rau rau a nih chuan theih tawp chhuah turin duhsakna kan hlan e.