Aizawl March 10, 2023 : Mizo Hnam Run ah vawiin khan chhung inkhawm neih a ni a. Social Rehabilitation Board Vice Chairman K. Liantlinga, Ex-MLA chuan thu sawiin, Inthlan an hmachhawn leh dawn a theih tawpin Party Worker te pawn tan an lak a ngai a ti a, Zoramthanga tluka finance enkawl thiam Mizoramah an awm lo a ti. 

MNF Adviser ni bawk Liantlinga chuan, "Kan sawrkarin sum leh paiah pawh nasa takin hma a sawn chho a, Mizoram hi leiba nei tlem pawl tak kan ni a, hei hian Finance Minister tha tak Chief Minister Pu Zoramthanga kan nei hi kan in chhuang hle tur a ni. Zoramthanga tluka finance enkawl thiam Mizoramah an la awm lo a. Kum 1998 khan Congress sawrkarin cheng vaibelchhe tam tak leiba min hnutchhiah chungin bul a tan a. PM Pu Vajpayee hnenah Peace Bonus Rs. Vbc. 182.45 chu a dil chhuak a ni. Tunhnaiah Congress hovin an ngum khak hmu lovin sum harsatna chungchangah min bei a. An hunlai khan sawrkarin sum a neih loh avangin Treasury vawi 30 chuang an khar a ni, a ti.