ZALEN December 2, 2023: Pachhunga University College leh MGH Korea te chuan vawiin hian PUC-a Korea tawng zirna hawng turin inremna thuthlung an ziak a, nakum January 27 hian class tan hman tum a ni.

Principal Conference Hall-a MoU ziahna inkhawmah hian PUC Principal Prof. H. Lalthanzara chuan, “NEP 2020-ah hian Zirna In te chu international levela lang thei tura tan la turin a duh a, Korea tawng zirna hawn pawh chumi kawngah chuan a pawimawh hle a ni," a ti a. PUC chuan zirna in hrang hrangte nena thawhhona neih a ngaihpawimawh thu leh Korea ram zirna inte nena thawhhona an la neih ngei a beisei thu a sawi bawk.

PUC-ah hian MGH Korea te hian zirtirtu rawn tirin Korea tawng hi a rawn zirtir dawn a. Korea tawng zir tur hi beginner level a ni ang a, thla thum zir tur niin a fee hi Rs 10000 a ni ang. PUC hian tawng zirna hmun tur leh an mamawhte a lo ngaihtuahsak bakah zirlaite admission te lo tihsak thung dawn a ni. A zir man chungchangah hian Prof. H. Lalthanzara chuan, “Hmun dangah chuan Korean Beginner level course atan hian Rs 15000 te lak thin a ni a, Mizoram tan bik fee hi an ti tlem a ni,"a ti.

Inremna thuthlung hi PUC aiawh Prof. H. Lalthanzara, Principal leh MGH Korea aiawh Kim Jungae ten an sign a. MGH Korea hian Canada, India leh Myanmar-ah te Korea tawng zirna an buaipui a, an ram sorkar atanga phalna nei an ni. An hotupa Dr Sangjoon Lee hi Hanyang University-ah industrial engineer zirtitu niin Samsung leh LG-ahte quality control lamah a lo thawh tawh bakah company hrang hrangah pawh experience a nei a ni.

PUC hian October ni 28, 2025 khan Japan tawng zirna hawng turin JACEEX LL Ltd. Guwauhati te nen thawhhona thuthlung an lo ziak tawh bawk a ni.