ZALEN August 14, 2026 : Pachhunga University College chuan an college dincham (foundation day) vawi 68-na, August ni 15 denchhenin, Home hrang hrang 4 hnenah tanpuina an pe.

PUC hi kum 1958-a din a ni a, an dincham apiang hian khawtlang tana luanchhuah programme an hmang thin a, kuminah hian Home pali - Operation Kingdom Ministry (OKM), Phunchawng, Aizawl; Thutak Nunpuitu Team (TNT), Zuangtui, Aizawl; Mizoram State Cancer Institute (MSCI), Zemabawk, Aizawl leh Society for HIV/AIDS and Lifeline Operation in Mizoram (SHALOM), Lower Zarkawt, Aizawl te hnenah tanpuina hi an hlan a.

 PUC hian kum 2021 atang khan an dinchamah an lo luangchhuak tawh thin a ni. Heng tanpuina an pek te hi zirtirtu, non teaching staff leh zirlai zawng zawngin an thawhkhawm a ni. Kumina an thawhkhawm hi Rs. 3,74,120 a ni a, a inzat theuhin heng home 4 hnenah hian an sem a ni. 

College dincham pual inkhawm hi College Seminar Hall-ah buatsaih a ni a, inkhawm hi College Vice Principal, Dr. Margaret Z. Khiangte chuan kaihruaiin, Principal Prof. H. Lalthanzara chuan thilpek hi a hlan a. Music Club leh zaithiam dangte an zai bawk.

PUC-ah hian zirtirtu 146 leh non-teaching staff 108 an awm a. UG zirlai 3151, PG zirlai 99, Ph.D zirlai 32 an awm a. Zirlai zingah hian state hrang 12 atangin zirlai 44 an awm bakah khawvel ram hrang 8 atangin international students 12 an awm mek a ni.