Aizawl: Pachhunga University College chuan Zirtawpni kalta khan PUC Multipurpose Auditorium-ah an kum 60 an din champha Diamond Jubilee lawmna leh inhlantharna hun an hmang.   Diamond Jubilee lawmnaah hian thu sawiin Principal, Dr. Tawnenga chuan kum 60 lai Pathian hruaina hnuaia hlawhtling taka an lo kal tawh chu lawmawm a ti a, he College hmasawnna tura tha lo thawh tawh zawng zawngte hnenah lawmthu a sawi.   Khuallian MZU Vice Chancellor, Prof. K.R.S.Sambasiva Rao pawhin Pachhunga College University hmasawnna chu ropui a tih thu te, he college hi India ramah pawh nep lo leh Northeast-ah phei chuan a tha ber pawl nia a hriat thu leh a chhuan thu a sawi a, he college hmasawnna tura thawhpui a inhuam reng thu a sawi bawk.   PUC Diamond Jubilee lawmnaah hian he college-a lo thawk tawh, Principal, zirtirtu leh non-teaching staff la damte; PUC dinna tura sum leh tha thawhtu Pachhunga te chhungkua leh Pu H.K.Bawichhuaka te chhungkua; College Governing Board hmasa bera member la dam awm chhun J. Malsawma leh he college zirlai batch hmasa ber la damte hnenah lawmpuina thil pek hlan an ni.   College-a zirlaite leh thawktute pawisa thawhkhawm ‘Charity Fund’ atangin Aizawl chhunga Children’s Home pangate hnenah tanpuina pek a ni bawk.