Mizoram Weightlifting Assocociation (MWLA)-in huang hrang hranga Mizoram State Level Weightlifting Championships a buatsaih mekah Pune atangin Mizo rit chawi chak enkawl zui tur an dap mek.

MWLA hian Ramhlun Sports Complex-a Weightlifting Academy-ah Ningani atang hian 4th Youth (Boys & Girls), 13th Junior leh 18th Senior Men & Women Mizoram State Level Weightlifting Championships a huaihawt mek a, hetah hian phai lam zirna thaa miten an hnena awm tur an thlithlai.

Army Sports Institute, Pune-ah Mizo zirlai eng emaw zat an awm a, heng atang pawh hian rit chawi chak paruk an tel a. Heng mite rual hian an zirna hmuna anmahni kaihruaitu ber, weightlifting incharge Lt. Col Nikhil Singh leh weightlifting coach M. Syamlal ten Mizo thalai rual zingah kaihhruai tur tha dap belh turin MWLA inelna hi an chhim mek a ni.

Army Sports Institute-a inzira awm mek, tun tum inelnaa inlante hi youth international-a medal la tawh vek pathum - Zakhuma, Lalzuidika, Jacob Vanlaltluanga  bakah Khelo Youth Games 2022-a 67kg-a bronze medal latu, Silvan Beihrothatlo te; 2022-a junior-a gold medal la, Lalhunthara leh Vanlalruata te an ni.

MWLA state championship-ah hian rit chawi chak mi 88 zet an inlan a. Hengte weightlifting club pasarih atang niin mipa 53 leh hmeichhia 35 an ni.

Indian Weightlifting Federation (IWLF) pawhin state level championship hi a ngai pawimawh a, he huanga inlan lo chu national championship-a an inlan pawh a phal lo va, hei vang hian lifter-te pawhin state huap inelnaa inlan ngei hi an tum thin. 

MWA buatsaih inelna hi Zirtawpni tlai hian Sports Minister Robert Romawia Royte hovin a kharna inkhawm hman tur a ni a. He hunah hian Commonwealth Youth Games-a gold medalist leh Asian Youth Weightlifting Championship-a palina, Lalruatfela chawimawina hun hman a ni bawk ang.