November 8, 2023; November ni 2, 2023 a Patiala, Punjab a boral, tuitla Nl. Lalnunthiangi (33) ruang chu vawiin ah Aizawl thlenpui a ni.

Anuni ruang hi vawiin khan thlawhna in Mizoram rawn panpui a ni a, Mission Veng a TT. Zothansanga In ah vui a ni ang.

A hun hnuhnung :

October ni 29, 2023 (Pathianni) tlai dar 5 bawr vel khan a unaunu Delhi a lehkha zir lai chu Police te’n phone-in Anuni phone leh ID velte Bakra Canal kama an hmuh thu leh amah hmuh tur a awm loh thu an sawi a. Patiala-a Mizo awm vete biak pawh nghal niin a chanchin ngaihvensak nghal tur a ngen an ni a. Anni’n theih tawp chhuahin an buaipui nghal a, chanchin erawh hriat nghal tur a awm mai thei lo va. Anuni unaupa Lalmuanawma pawh Patiala panin a tukah a chhuk thla nghal a, a hmunah Police te nen theih tawpin a zawn hna thawhzui nghal char char a ni.

A bo atanga ni 5-na, November ni 2, 2023, zar dar 11:00 bawr vel khan Canal thlang lam, a bungrua an hmuhna atanga km 98 velah ruang hmuh a nih thu dawn a ni a. Ruang hi Anuni ngei a ni tih finfiah a ni ta a ni.

A in luahna nuin a sawi danin, Anuni hian October ni 28, 2023 chawhnu lam khan a thiante nen an len chhuah ve lawk tur thu a hrilh a, a rei vak loh tur thu a hrilh nghe nghe. A vuina programme a a chanchin ziah a nih danin, a thihnaah rinhlelhawm thil a awm lo niin a lang a, vanduai vanga tui tla ni ngeia hriat a ni.

Anuni hian a zin kawngah hian a thil tum lian ber lehkha zir chhuah chu a hlen chhuak hman ta lo va. Chutih rualin, an hotute duhsakna a dawng a, thla hnih kal ta atang khan part time Asst. Professor hna an thawhtir a, a thawh chhuah hmasa ber atangin Rs. 10,000 chu Guwahati kohhran-ah biak in thutthleng lei nan a thawh a ni.