Aizawl: Nimin khan Project Pushpak hotute chuan Governor Kummanam Rajasekharan chu Raj Bhavan-ah an hmu a, Mizorama kawngpui awm dan te leh an dinhmun tlangpuite an hriattir.   Chief Engineer Brig. Birender Singh chuan Border Roads Organisation (BRO)-in kawngpui a enkawl mekte chu presentation hmangin a sawifiah a. Kawnpui-Durtlang-Aizawl Road leh Sairang Tuipuibari Road te chu National Highway Double Lane (NHDL) specification mila zauh an nih theih nan hmalakpui turin a ngen a ni. Project Pushpak-in sum harsatna avanga kawngpui a enkawl laite a enkawl that theih loh thu a sawi bawk a ni.   Governor chuan Project Pushpak hmalakna chu fakin, inkalpawhna kawngpui tha zawk a awm theih nan leh a enkawlna tur sum tam zawk an hmuh theih nan sawrkar laipui thlen a inhuam thu a sawi a. BRO-ten kawngpui leh airfield thar siam tura an ruahmannate chu enfiah a, thuneitu sang zawk hnena thlen a inpeih thu a sawi bawk.