Aizawl; PWD Minister Lal Thanzara chuan Zirtawpni khan 4216(P) Government Housing Fund sum Rs 2,18,55,000 /- senga sak PWD (Architect) building thar, Tuikhuahtlang ah a hawng. PWD (Architect Cell) Building, Tuikhuahtlang hi a building pumpui zau zawng chu 1195 sq.m. a ni a, Chief Engineer (Buildings) Design Cell leh Chief Architect Office bakah Staff Quarters 2 dah a ni bawk. Mizo chhiara in chhawng 5 neia sak a ni. Minister chuan PWD chu ram hmasawnna ruhrel pawimawh khawihtu an nih thu sawiin kawngpui siamthat nana World Bank atanga cheng vaibelchhia 600 chuang Mizoram-in a hmuh tur hmanga hmalakna tur ruahman dan hrang hrang te a sawifiah a. Minister chuan Medical Council of India-in a remtih chuan kum 2015 ah MBBS zirlai 50 awm theihna Mizoram Institute of Medical Education and Research (Medical College) Falkawn-a din tura chak taka hmalak mek a nih thu sawiin, Mizoram hmun hrang hranga Doctor leh Nurse indaihlohna phuhruk nan Sorkar chuan lak belh tura a bawhzui mek thu a sawi bawk.