Aizawl April 5, 2023 : Vawiin khan Raj Bhawan-ah PWD hotuten Governor Dr. Haribabu Kambhampati hnenah an Department hnathawh leh hmalakna thenkhat – National Highway leh Pradhan Mantri Gram Sadak Yojana (PMGSY) chungchang an hrilhfiah a, Tuivai lui a lei dawh turah Governor chu ministry lama sawipui turin an ngen.

Larsap chuan PWD hotute chu hna an kalpui mek dinhmun te, hna a hun taka zawhloh a nih chhan te leh hemi kawnga harsatna in nei te hriat a duh vanga ko a nih thu a lo hrilh a, Ministry lamah sawipui leh thlen a duh avanga an hnathawh chungchang te hriat a duh tih a lo hrilh bawk. 

PWD hotute chuan National Highway leh a kaihhnawih hna panga, cheng vaibelchhe 2554.98 hu an thawk mek thu an sawi a, NH-108 (Sairang – New Eden, Tripura) chu za zelah 94 zawh a ni tawh an ti a ; NH-501A (Lawngtlai – Zochachhuah, KMTTP) chu za zelah 98.01 zawh tawh tiin, NH-2 (Seiling-Tuivai) in a huam chhunga, km 17.5 a thui chu tunhnai khan zawh fel a nih thu an hrilh. Hna dang 2 te chu thawh mek a nih thu leh National Highway hna thar 3 tan tur an neih thu an hrilh bawk.

PWD lam chuan hna dang 6 pawh proposal Ministry of Road Transport and Highways (MORTH) an an thehlut mek an ti a. Hemi zinga mi Tuivai lui chunga lei dawh tur chu a pawimawh avangin hemi chungchang hi a hranpa in Larsap chu Ministry lama sawipui tura an duh thu an thlen bawk a ni.

Pradhan Mantri Gram Sadak Yojana (PMGSY) hnuai hmalakna te chu PWD hotute hian sawi bawkin PMGSY chu kum 2000 atanga thawh tan a nih thu leh Phase 12 hnuaia Mizoram pumah project 351, kawng kilometre 4482.732 a thui cheng vaibelchhe 2840.08 man sanctioned a nih thu Governor hi an hrilh. Heng zinga project 300 chu thawh zawh tawh niin project 51 thawh mek a ni a, sanctioned kilometre 4482.732 atangin 4247.534 a thui chu zawh tawh niin kilometre 277.735 an la thawh mek a ni, an ti. Heng project avang hian khua 232 zinga 216 chuan PMGSY kawng a nei tawh tih an hrilh bawk. 

Larsap chuan Bairabi leh Sairang rel kawng inkara Railway Station 4 awm te chu a bulhnaia khua awmte nen inkawlpawhna sial a pawimawh thu sawiin hmalak pawimawh a tih thu PWD te hi a lo hirlh.

Mizoram chhunga National Highway sial tawh leh sial mek zawng hi kilometre 1509 a ni a, hemi zinga kilometre 650 chu PWD in a sial tawh leh hma an lak mekna te a ni a; a bak chu NHIDCL in chan te an ni. Heng zinga thui ber chu NH-2 tia vuah tak ; Seling – Tuipang (NH-54) leh Seling Tuivai (NH-150) suihfin khi a ni a, kilometre 481 a thui a ni.