Aizawl: Nimin khan Aizawl chanchinbumi te chuan PWD in Aizawl leh a chhehvel kawng an siam mek an tlawh. PWD Aizawl Road South Division hotute chuan tunlai hian an sum neih nuai 250 hmangin Bazar Bungkawn atanga Silaimual inkar leh Sikulpuikawn atanga Zodin Square inkar an siam mek tih sawiin sum awmloh avangin tui luh theihlohna (seal coating) chauh an hmang tih an sawi a. Ruahtui a tlak hunah helai kawng pawimawh hi a chhiat chuan a siamna tur sum a awm tawh dawn lo va, chuvangin ruahtui lut tur venna chauh hi tun tumah chuan an ti thei niin Press mite an hrilh. PWD hotute chuan tuna an thawh mek hi kum 2013 khan JNNURM hnuaiah Sunshine Oversea Pvt. Ltd. chuan an lo thawk tawh nia sawiin mahse ruahtui luh theih lohna tur seal coating an tih loh avangin a chhe tan niin an sawi a. Kawng siam mai mai a harsat avangin kawngpui chu dim turin mipuite an ngen a ni. PWD hotute chuan Aizawl by pass(World Bank road) ah leh Reiek kawng an siamah te mi thenkhatin culvert te tipingin an duhna lai laiah an block a. Kawng sirah leivung paih an awm bawk avangin kawngpuiin a chhiat phah nasa tih an sawi a. Kawngpui ah tuihawk a luan vangin a chhe hma a, leivung paihin tuihawk kalna tur a tihbuai avang leh leivung paih vangin kawng a zim phah niin an sawi a, hei hian mipui ah harsatna nasa tak a thlen niin an sawi bawk. PWD thawktute chuan November 2013 atang khan an hnathawhna a hman tur lirthei hire-na man pek a la nilo nia sawiin tun dinhmunah Road South Division bat tlingkhawm chu Rs 3,48,000 a tling tawh nia sawiin Mizoram PWD hnuaia motor hire-na a bat zat chu Rs. vaibelchhe 6 a chuang a ni tawh niin an sawi bawk a ni.