July 14, 2022; Vawiin khan Mizoram PWD leh Central YMA chuan Mizoram kawngpuite a lo that zawk theihna turin thawhhona thuthlung (MOU) an ziak a, PWD hotute chuan PWD leh YMA thawhhona chu contractor ten an duh vak lo thin tih an sawi a, tunah erawh contractor engemawzahin tha an tih thu leh chung mite chu hnathawk tha, YMA te nen pawh a thawhhona nei tha an nih thu an sawi.

MOU hi vawiin chawhnu dar 1 khan PWD E-in- C conference room, Tuikhuahtlangah ziah a ni a, he hunah hian PWD E-in-C Bowman chuan, YMA nen a MOU ziah a ni chu lawmawm a tih thu sawiin, thawhhona pawh a hma ai chuan a that tawh zawk a rinawm thu leh an inhmantham tawh zawk a rinawm thute a sawi.

"PWD leh YMA thawhdunna thuthlung chu contractor ten an duh lutuk lo tih chu a dik tih sawiin, tunah erawh chuan contractor engemawzatin tha an tih thu an sawi tawh a, chung mite chu hnathawk tha, YMA te nen pawh a thawhhona nei tha an ni," PWD E-in-C chuan a ti.

Central YMA president R. Lalngheta pawhin, an thawhhonain thui tak hmasawnna a keng tih sawiin, chumi kawngah chuan kawng tha an duh luat ah demand an la neih ngai loh thu leh chu chu kawng tha an duh luat vanga sawrkar sum ei hek an duh loh vang a nih thu te a sawi.

Vawiin a thawhhona thuthlung ziahah hian YMA aiawhin, Central YMA president R. Lalngheta leh GS. Prof. Lalnuntluanga ten hming an ziak a, PWD aiawhin, E-in-C Bowman leh Lalrinkima Hnamte, CE (Planning) ten hming an ziak a ni.

Mizoram PWD leh YMA thawhhona tur thuthlung tlangpui:

• MOU in thawhhona ziah 14th July, 2022 atanga kum 3 chhung a huam ang.
• Hnathawh tur lian zual deuhah bul tan a nih hmain, a bialtu PWD hotute ruahmannain hnathawhna tur huamchhunga YMA branch/group/sub.hqrs hruaitute nen project nihpung etc. inhrilhfiahna neih thin tur.
• Project intanna leh tawpna, a paltlang kawng/khua ah te detailed information PWD in a duan angin informatory board, PWD senso in tar thin tur.
• Hnathawh laiin, hun remchangah PWD leh YMA hruaitu ten joint inspection an nei ho ang. A tul dan a zirin bialtu MLA/sawrkar hotu dang leh NGO dangte sawm theih an ni ang.
• Hna thalo te a awm chuan, YMA in a mala hmala mai lovin, EE/SDO te nen sawiho a nih hnuah department in contractor te instruction pek thin tur a ni ang.
• Kawng siam mek tikhaihlak zawnga khawsa leh harsatna siam an awmin, YMA leh department te inrawnin a tul angin hmalak a ni ang.
• Guideline for road safety chungchanga kawngpui leh side drain te a him theih nan a tul angin Branch YMA in an huam chhungah zirtirna an pe thin ang.