ZALEN, Sept. 19, 2024: Mizoram châk lak luhna kawng, Kawnpui leh Khamrang inkar chhe lutuk nia sawi chu Nilaini hian PWD Minister Vanlalhlana hovin Mizoram Truck Owners Association (MTOA) leh Mizoram Truck Drivers Association (MTDA) hruaituten an en dawn.

Thawhlehni khan minister hian Kolasib bialtu MLA Lalfamkima nen a pisaah pawl pahnih hruaitute an kawm a, kawng chhia avanga harsatna an tawhte sawiin chak zawka siam a nih theih dante an sawiho va, a hmuna enfiah an tum nghal a ni.

State pawn atanga Mizoramin châk a lak luhna kawng hi tun lai hian a chhe hle a, Thawhtanni atang khan NH-306-a Dur Lui (Khamrang) atanga Kolasib inkar hi siam hna thawh tan mek a ni a. Hei vang hian Thawhlehni khan Sr. Superintendent of Police, Traffice, Aizawl chuan lirthei tlan tan tur thupek thar a chhuah leh.

Chak zawka kawng siam hna thawh a nih theih nan Nilaini leh Ningani hian zing dar 9:00 leh tlai dar 5:00 inkarah kawngpui hi khar a ni dawn a. Lengpui lam atanga Sairang pante pawh Sairang Buichali Lei pela kal phal a ni lo bawk.

Kawng chhia avanga lirthei a tlan theih loh avang leh tlan a sawt loh avangin kar liam ta tawp lam atang khan mipui ni tin mamawh pawh a vâng tan a, thil thenkhat chu a to phah bawk.