ZALEN October 4, 2025: West Phaileng MNF Unit Joint meeting chu vawiin khan Kanan Branch YMA Information building, W. Phaileng-ah buatsaih a ni a. He huna thusawitu Dampa bial By-Election MNF Official Candidate Dr. R. Lalthangliana chuan PWD Minister-in Dampa bial mipuite a vau chu tha ta tih loh thu a sawi.

Dr. R. Lalthangliana chuan, "Kalphung thar tha zawk leh mipui sawrkar siam tura an intiam nasat hle laiin; PWD Minister-in a campaign-naah Dampa bial mipui a vau kha a ṭhalo tak zet a. Bial hmasawnna tura hmachhawp mek, Pukzing leh Silsuri inkar kawng, NESIDs sum aṭanga a siamna tur awm sa leh siam tum mek pawh ZPM candidate a tlin loh chuan ngaihtuah nawn leh a ngai ang, tia a sawi hi Dampa bial mipui hmuhsitna leh tham lohnaah ka ngai a, sawrkar thuneihna hmanga mipui rahbehna lian tak a ni. Hetiang hi democracy rama thil thleng atan thil tih chi loh tawp a ni a, mipui inchung tlaka invauna tawngkam hmang tawhlo turin sawrkar ka ngen a ni," a ti.

MNF Senior Vice President chuan, "He lai kawng hi kei pawhin a hmunah kar hmasa khan ka tlawh a. 4×4 Pick-up truck pawh chhuk zawnga kal hleih theih loh khawpa chhe nasa a ni. Heng lai vela cheng khawsak harsa zawkte ei bar chawk luhna ber a ni si a, a bikin damloh ni khuaah inphurh kual changin damlote an lainatawm tak zet a. Ka nau Rintluanga Sailo pawh khan MNF sawrkar lai atang tawha a vei leh ngaih pawimawh em em a ni a, tunah a hlawhtlinna a lo thleng dawn ta cheng a, a lawmawm tehreng nen. Sawrkar hian ngaih pawimawh hmasak berah nei ngei rawh se," a ti.

Dr. Thangtea hian Minister meuhin hetiang thu a sawi hi tak tak a ni dawn em ni tia ngaihtuahna a neih laiin, a video hmuh tur a lo awm bawk si chu mak a tih hle thu a sawi bawk.