An ram Porto muala tlawhtu Turkey an hneh hunah Portugal chuan 2022 World Cup khel turin beiseina eng an nei thar. Estadio do Dragao muala inkhelhah hian mual neitu lam Portugal hian Otavio leh Diogo Jota te hmangin first-half-ah goal hnih an thun a, Qatar lama an mitthla nghal ruakin a rinawm.  

Turkey lamin tlawm mai an tum lo, Burak Yilmaz chuan minute 65-naah Turkey tan goal a rawn thun ve a, minute 85-ah an goal phurh sutna remchang neiin penalty an hlawhchhuak a, Turkey tana goal hmahruai khungtu Burak Yilmaz bawk a rawn pen chhuak, mah se vanduaithlak takin crossbar pet per hlauha goal-ah a chantir zo lo. 

An chakna tichiang tur leh an goal thumna chu added-time minute 94-naah Matheus Nunes chuan rawn thun ve lehin hun a tawp zui. Fernando Santos-a pawl te hian Qatar an pan dawn leh dawn loh Thawhlehni khian Italy hnawtchhuaktu North Macedonia lakah fiahna an hmachhawn ang. 

Portugal tan hian World Cup tum li champion tawh Italy ai chuan North Macedonia lam hi tum an chakawm zawk ngeiin a rinawm a, mah se an hmachhawn tur te hi European champion hnehtu an ni tih erawh an theihnghilh a thiang lo thung ang. 

Portugal boss Santos chuan,"He game hi kan tan chuan final a ni a, final hi chu a harsa fo thin. Final vawi khatna kan paltlang tawh a, final vawi hnihna pawh hi kan chak leh ngei a ngai dawn a, chumi thlir chung chuan theih tawp kan chhuah a ngai a ni," a ti.