ZALEN, Feb. 15, 2025: India rama cricket khawpui ber pakhat, Kolkata, West Bengal-a inkhelh zirna inpui hriat hlawh, Harvard House Sports-in trial a kalpuiah Mizo naupang, Joel Lalthakima chu tlingin Qatar leh England-ah a inkhel thei dawn.

Kum 12 mi, Joel-a hi Aizawla Vaivakawna cheng a ni a. Harvard House Sports-in cricket khel thiam naupang a zawnnaah hian mahni sum senga inlanin Inrinni khan kum 15 hnuai lam huangah khel zui turin a tling a ni.

Joel-a hi a chenna, Vaivakawn Cricket Club-a inziak lut mek niin a la naupan avangin senior team-ah chuan a la inlan pha lo va, tunah hian Mizoram Cricket Academy (MCA)-ah inzirin a la awm mek bawk.

Mizo naupang zinga batter tha pawl ni mek, Joel-a hi a chhungten cricket khelh an tuipui hle a, kum riat mi a nih lai atang tawha khel niin an veng club academy bakah Hunthar Cricket Club academy-ah pawh inzirin a lo awm tawh thin.

Kolkata-a trial a neihna hi naupang chher kawnga hriat hlawh tak niin a enkawltu zingah hian Board of Control for Cricket in India (BCCI)-a umpire ni phate pawh an tel a. Tum tumah hian trial nei tur hian Mizoram atangin Joel-a chauh hi a kal a ni.

Joel-a hi May thlaah Qatar khawpui, Dubai-ah vawi thum leh London-ah vawi sarih inkhel turin a tling ta a. Hetiang a thleng thei hi Cricket Association of Mizoram (CAM) pawhin a lawmpuiin a kal zelna turah duhsakna a hlan.