Aizawl: Nimin zing dar 7:40 vel khan Zemabawk venga Berawlui quarry chu a chim a, nu leh a fanu bakah mi dang pahnih chu quarry chim hian a delh hlum. Quarry chimin a delh hlumte hi Linda Zodinpuii (K-32) w/o Lalrinsanga leh a fanu, Eudy Lalremzovi (K-10), Linda Hmingthianghlimi (K-14) d/o Immanuel Lalhmelmawia  leh Munga (K-40) h/o Lalhmunliani te an ni a. Chanchin thar buatsaih a nih lai hian naupang pahnih, Linda Hmingthianghlimi leh Eudy Lalremzovi te ruang lakchhuah a ni tawh a. Quarry chim hian lirthei 407 LPK pahnih a delh bawk. John L.T.Sanga, Addl. DC, Aizawl chuan Zalen zawhna chhangin quarry chimna hmunah hian JCB 3 leh Hitachi 1 tirh nghal a nih thu a sawi a. Ngawrh taka ruang zawn hna thawh a nih thu sawiin hna a hautak em avangin nilenga an beih hnuah pawh 407 pakhat zawk hi a awmna pawh an la hre hleithei lo niin an sawi. Addl. DC chuan PWD, Disaster Management directorate te leh National Disaster Response Force (NDRF) leh mi dangte nen an tanho thu a sawi a. Ruang awmna a puk thin hle tih sawiin lung lian zual chu JCB tan tihsawn ngaihna a awm loh avangin an hal darh niin a sawi bawk. Central YMA Vice President R. Lalngheta chuan Quarry chimna hmunah hian Chief Executive member a thei thei an kal tih sawiin thingpui lumna an pek thu a sawi bawk. Quarry chim chhan hi hriat a ni lo a, a veng mite sawi danin tun hnaiah hian lung hi an la hnem hle a, an la puk deuh ruih a, hemi avang leh tun hnai ruahsur nasa vang a ni thei niin an sawi a ni. Quarry neitu hi John Halliday niin thudawnna chuan a sawi a ni.