British khua leh tuite chawimawina sang ber 'knighthood' chu Queen guitarist Brian May hnenah hlan a ni. King Charles III chuan kum 75 mi Brian May hnenah hian Thawhlehni khan knighthood hi a hlan a, ceremony hi Buckingham Palace-ah buatsaih a ni. 

Legendary rock guitarist Brian May hi rimawi khawvelah chuan hming dai tawh lo tur zinga mi a ni a, a sulhnu ropui tak avang hian chawimawina sang hi hlan a ni. Bristish rock band lar Queen dintu zinga mi a ni a, khawvelin a theihnghilh ngai tawh lo ang. Queen hian an official account-ah, "Arise Sir Brian May" tiin lawmpuina thu an tarlang a, knighthood an hlan ruala 'Sir' title a neih pawh an tarlang nghal.

Brian May chauh hi Queen member zinga Bristish lal chhungkua atanga chawimawina dawng awm chhun a ni lo thung a, an drummer Roger Taylor chu kum 2020 khan Officer of the Order of the British Empire atan ruat a ni. May pawh hi kum 2005 khan Commander of the Most Excellent Order of the British Empire atan ruat ba lo ni tawh bawk. 

Brian May hi rimawi huang piah lamah pawh a thawhhlawk viau mai a, kum 2010 khan organization pakhat 'Save Me Trust' a din a, ramsa pelh titawp turin hma a la nasa hle.