India rama civil mite chawimawina sang Padma Shri chu Mizo folk singer KC Runremsangi hnenah nimin tlai khan India President Droupadi Murmu chuan a hlan ta. Padma Shri hlanna hun hi Pragati Maidan, New Delhi-ah neih a ni a, KC Runremsangi hi art (vocals) huanga Mizo zinga Padma Shri dawng hmasa ber a ni ta a ni. 

Mizo zingah art (vocals) huang atanga Padma Shri dawng hi an la awm ngai lo a, KC Runremsangi hi a hmasa ber a ni ta a ni. Kum 59 mi KC Runremsangi hian kum 2017 khan folk music lama a thawhhlawk avang hian India President Ram Nath Kovind hnen atangin 'Sangeet Natak Akademi Award' a lo dawng tawh bawk. 

KC Runremsangi hi March 1, 1963 khan Keitum khuaah a piang a, tunah hian Bawngkawn South-ah a pasal fanute nen an khawsa mek a ni. Kum 1986 khan Aizawl-ah hian an pem a, All India Radio-ah artist a ni.

Amah hi zaithiam niin, kum thum mi lek a nih lai atangin a zai tan - audio album pwh pariat zet a lo tichhuak tawh. Kum 1992 khan Art & Culture Department a zawm a, tun thengin lam zirtirtu 'Dance Instructress' a ni mek. Lam leh zai lama a thawhhawk em avang hian January 25 khan Padma Shri dawng tura thlan a nih thu puan a ni a, April 5, 2023 Nilaini khan hlan a ni ta a ni.  

'Queen of Mizo Folk Song' an tih hial KC Ruremsangi hian rimawi khawvelah sulhnu ropui tak a hnutchhiah a, a hnutchhiah mek zel bawk. A hnathawh ropui tak avang hian India rama civil mite hnena hlan thin chawimawina sang leh ngaihhlut hlawh em em mai Padma Shri a dawng ta hi ZALEN chhungkua chuan kan lawmpuiin a kal leh zelna turah duhsakna kan hlan e.